पुणे: रेल्वे प्रवासात मोठ्या आवाजात गाणी ऐकणे, मोबाईलवर रील्स पाहणे किंवा मोठ्याने फोनवर बोलणे आता महागात पडू शकते. सहप्रवाशांना होणारा त्रास टाळण्यासाठी रेल्वेने अशा प्रकारांवर कारवाई करण्याची भूमिका घेतली आहे. प्रवासादरम्यान काही प्रवासी मोबाईलवर मोठ्या आवाजात गाणी लावतात, व्हिडिओ पाहतात किंवा मोठ्याने बोलतात. तसेच मोबाईलची रिंगटोनही अनेकदा मोठ्या आवाजात वाजवली जाते. त्यामुळे शांततेत प्रवास करू इच्छिणाऱ्या इतर प्रवाशांना त्रास सहन करावा लागतो. या प्रकारांना आळा घालण्यासाठी रेल्वे कायद्याच्या कलम १४५ अंतर्गत कारवाई केली जाऊ शकते.
रेल्वे प्रवासात नियमांचे उल्लंघन करणाऱ्या प्रवाशांवर दंडात्मक कारवाई होण्याची शक्यता आहे. पहिल्यांदा नियम मोडल्यास एक हजार रुपयांचा दंड, तर पुन्हा नियम मोडल्यास पाच हजार रुपयांपर्यंत दंड किंवा सहा महिन्यांपर्यंत तुरुंगवास होऊ शकतो, अशी माहिती देण्यात आली आहे. काही प्रकरणांमध्ये दंड आकारून संबंधित प्रवाशाला रेल्वेतून उतरवण्याची कारवाईही केली जाऊ शकते. त्यामुळे प्रवाशांनी प्रवासादरम्यान नियमांचे पालन करणे आवश्यक आहे.
रेल्वे प्रवास अधिक शांत आणि सुखकर होण्यासाठी प्रवाशांनी काही गोष्टींची काळजी घेणे गरजेचे आहे. मोबाईल सायलेंट किंवा व्हायब्रेशन मोडवर ठेवावा. गाणी ऐकताना, व्हिडिओ किंवा रील्स पाहताना इयरफोनचा वापर करावा. फोनवर बोलताना आवाज कमी ठेवावा आणि अनावश्यक लांब संभाषण टाळावे. एखाद्या प्रवाशामुळे त्रास होत असल्यास रेल्वे कर्मचाऱ्यांकडे किंवा रेल मदत अॅपवर तक्रार करता येते. रेल्वे प्रवासात प्रत्येकाने इतरांच्या सोयीचा विचार केल्यास सर्वांचा प्रवास अधिक शांततापूर्ण आणि आरामदायी होऊ शकतो.
