भाड्याने दिलेल्या जमिनीचे बक्षीसपत्र करून लाटली? ‘माझ्या आयुष्याची कमाई गेली; न्याय न मिळाल्यास आत्महत्येशिवाय पर्याय नाही’; सेवानिवृत्त शिक्षकाचा न्यायासाठी आक्रोश!

पुणे, ता. 19 : वडाचीवाडी (ता. हवेली) येथील जमीन भाड्याने देण्याच्या व्यवहारातून ओळख निर्माण झाली आणि त्यानंतर विश्वासाचा गैरफायदा घेत आपली 17 गुंठे जमीन बक्षीसपत्राद्वारे स्वतःच्या नावावर करून घेतल्याचा गंभीर आरोप सेवानिवृत्त शिक्षक रामदास ज्ञानोबा उगले यांनी हेल्पिंग हँड सोशल फाउंडेशनच्या स्वाती सुभाष डिंबळे यांच्यावर केला आहे. या प्रकरणात आपली फसवणूक झाल्याचा दावा करत उगले यांनी प्रशासनाकडे न्यायाची मागणी केली आहे. तसेच, न्याय न मिळाल्यास आत्महत्येचा विचार करण्याची वेळ आल्याचे त्यांनी निवेदनात म्हटले आहे.

रामदास उगले यांच्या म्हणण्यानुसार, जानेवारी 2024 मध्ये त्यांनी स्वाती डिंबळे यांना तीन गुंठे जमीन आणि दोन कॉटेज भाड्याने देण्याचे ठरविले होते. मात्र, भाडेकरार करण्याच्या कारणावरून त्यांना विश्वासात घेण्यात आले आणि 31 मार्च 2024 रोजी 17 गुंठे जमिनीचे बक्षीसपत्र करून घेण्यात आल्याचा त्यांचा आरोप आहे. या व्यवहारात आपल्याला अपेक्षित असलेला भाडेकरार न होता जमिनीची मालकीच दुसऱ्याच्या नावावर गेल्याचे उगले यांचे म्हणणे आहे.

डिंबळे यांनी त्यांना भाऊ मानल्याचे सांगून विश्वास संपादन केला. मात्र, स्वतःला मुलगी, भाऊ, बहीण आणि पुतणे असताना आयुष्यभराची कमाई दुसऱ्याच्या नावावर करण्याचे कारण काय, असा सवाल त्यांनी उपस्थित केला आहे. संबंधित बक्षीसपत्रातील नातेसंबंधांच्या नोंदींबाबतही त्यांनी आक्षेप घेतला आहे.

मोबाईलमधील पुरावे पुसल्याचा आरोप

28 मे 2026 रोजी दुपारी एकच्या सुमारास स्वाती डिंबळे आणि त्यांचे वाहनचालक कपिल अनगोंडे यांनी आपली गाडी अडवून मोबाईलमधील महत्त्वाचे व्हिडिओ आणि अन्य पुरावे जबरदस्तीने हटविल्याचा आरोप उगले यांनी केला आहे. या घटनेनंतर काळेपडळ पोलीस ठाण्यात जाऊन संबंधित अधिकाऱ्यांना माहिती दिली; मात्र आपली तक्रार गांभीर्याने घेतली गेली नाही, असा दावाही त्यांनी केला आहे. तसेच, कपाटातील महत्त्वाची कागदपत्रे चोरीला गेल्याचा आणि घरातून बाहेर काढण्यात आल्याचाही आरोप उगले यांनी निवेदनात केला आहे. या प्रकरणी पोलिसांकडे वारंवार तक्रार करूनही अपेक्षित कारवाई झाली नसल्याचे त्यांचे म्हणणे आहे. पोलीस आयुक्तांकडेही दाद मागितल्याचा दावा त्यांनी केला आहे.

 

भाडे, कॉटेज आणि झाडांच्या नुकसानीचाही मुद्दा

उगले यांनी दिलेल्या निवेदनात एक लाख रुपये उसने दिल्याचा, भाड्याची रक्कम थकविल्याचा तसेच परिसरातील कॉटेज आणि लोखंडी झोपाळा तोडल्याचा आरोपही करण्यात आला आहे. गेल्या अनेक वर्षांत जोपासलेली दुर्मीळ औषधी वनस्पती आणि झाडांचे नुकसान झाल्याचे सांगत त्यांनी संबंधित विभागांकडे तक्रार केल्याचे नमूद केले आहे. योगसाधना आणि औषधी वनस्पतींच्या माध्यमातून सुरू असलेले आपले कामही अडचणीत आल्याचे त्यांनी म्हटले आहे. दरम्यान, या संपूर्ण प्रकरणाची सखोल चौकशी करून जमिनीच्या बक्षीसपत्राची कायदेशीर वैधता, कथित फसवणूक, कागदपत्रे चोरीला गेल्याचा आरोप आणि मोबाईलमधील पुरावे हटविल्याच्या तक्रारीची तपासणी करावी, अशी मागणी रामदास उगले यांनी केली आहे.

याबाबत अधिक माहिती घेण्यासाठी हेल्पिंग हँड सोशल फाउंडेशनच्या स्वाती सुभाष डिंबळे यांच्याशी संपर्क साधण्याचा प्रयत्न केला. परंतु, त्यांनी फोन न उचलल्याने त्यांची प्रतिक्रिया मिळू शकली नाही. संबंधित व्यक्तींची प्रतिक्रिया आणि पोलिसांची अधिकृत भूमिका मिळाल्यानंतरच प्रकरणातील वस्तुस्थिती स्पष्ट होऊ शकेल. त्यामुळे उगले यांनी केलेले आरोप हे सध्या त्यांचे दावे असून, त्यांची स्वतंत्र पडताळणी होणे आवश्यक आहे.