शिरूर: एटीएममधून पैसे काढण्यासाठी गेलेल्या सेवानिवृत्त प्राचार्याला मदत करण्याच्या बहाण्याने एका अनोळखी इसमाने त्यांच्या एटीएम कार्डची चलाखीने अदलाबदल करून खात्यातून तब्बल ३८ हजार रुपये काढून घेतल्याची घटना शिरूर शहरात घडली.याप्रकरणी शिरूर पोलीस ठाण्यात फसवणुकीचा गुन्हा दाखल करण्यात आला आहे.
पोलिसांनी दिलेल्या माहितीनुसार, मंगळवारी (ता.८) सायंकाळी सुमारे सव्वा पाच वाजण्याच्या दरम्यान करडे (ता.शिरूर) येथील रहिवासी व सेवानिवृत्त प्राचार्य तिरसींग लक्ष्मण पाचर्णे (वय ६६) हे बी.जे.कॉर्नरजवळील बँक ऑफ महाराष्ट्रच्या एटीएममध्ये पैसे काढण्यासाठी गेले होते.
पाचर्णे हे एटीएममधून व्यवहार करीत असताना तेथे उपस्थित असलेल्या अंदाजे ३० ते ३२ वर्षे वयाच्या अनोळखी इसमाने त्यांच्याशी बोलण्यास सुरुवात केली. “आपके पैसे कट हुये है, आपने एटीएम की स्लिप क्यों नहीं ली,रुको मैं आपको स्लिप निकालकर देता हूं,” असे सांगून त्या इसमाने पाचर्णे यांच्याकडून एटीएम कार्ड घेतले व कार्डचा पिन नंबर विचारून घेतला.याच दरम्यान मदत करण्याच्या बहाण्याने त्याने पाचर्णे यांच्या एटीएम कार्डची अदलाबदल केली.त्यानंतर त्यांच्या मूळ एटीएम कार्डचा वापर करून त्यांच्या बँक खात्यातून ३८ हजार रुपयांची रक्कम काढून घेतली. काही वेळाने आपली फसवणूक झाल्याचे लक्षात आल्यानंतर पाचर्णे यांनी पोलिसांकडे धाव घेत तक्रार दाखल केली.त्यानंतर शिरूर पोलीस ठाण्यात फसवणुकीचा गुन्हा दाखल करण्यात आला आहे.
पोलिसांनी दिलेल्या माहितीनुसार या घटनेतील आरोपी अनोळखी असून,त्याचा शोध घेण्यासाठी पोलिसांकडून तपास सुरू आहे.तसेच एटीएम परिसरातील उपलब्ध तांत्रिक माहिती व इतर पुराव्यांच्या आधारे आरोपीला लवकरच शोधण्यात येईल असे पोलिसांनी सांगितले आहे. या गुन्ह्याचा तपास पोलीस उपनिरीक्षक शुभम चव्हाण करीत आहेत.
एटीएममध्ये अनोळखी व्यक्ती मदतीच्या बहाण्याने कार्ड हातात घेत असल्यास नागरिकांनी विशेष सावधगिरी बाळगावी.कोणत्याही परिस्थितीत आपले एटीएम कार्ड, पिन किंवा बँक व्यवहाराची माहिती अनोळखी व्यक्तीला देऊ नये.असे आवाहन शिरूर पोलिसांकडून करण्यात आले आहे.
