Loni kalbhor : हवेली तालुक्यातील ग्रामपंचायतींच्या हक्काचे मुद्रांकशुल्क अनुदान अद्याप प्राप्त न झाल्यामुळे गावपातळीवरील अनेक महत्त्वाची विकासकामे ठप्प झाली आहेत. या पार्श्वभूमीवर, हवेली पंचायत समितीचे सभापती युवराज हिरामण काकडे यांनी पुणे जिल्हा परिषदेचे उपमुख्यकार्यकारी अधिकारी भूषण जोशी यांची भेट घेऊन प्रलंबित निधी तात्काळ वितरित करण्याची आग्रही मागणी केली आहे.
मार्च अखेर जवळ आली असतानाही निधीअभावी पाणीपुरवठा, रस्ते, पथदिवे आणि स्वच्छतेसारख्या मूलभूत सुविधांची कामे रेंगाळली आहेत. निधी उपलब्ध नसल्याने नवीन कामांचे नियोजन करणे कठीण झाले असून, तालुक्यातील अनेक ग्रामपंचायतींकडून पंचायत समितीकडे निधीबाबत वारंवार विचारणा केली जात आहे. ग्रामपंचायतींच्या आर्थिक अडचणी लक्षात घेऊन हा निधी तत्काळ मिळणे आवश्यक असल्याचे सभापती काकडे यांनी निवेदनात नमूद केले आहे.
राज्य शासनाच्या ‘मुख्यमंत्री समृद्ध पंचायत राज अभियानाची’ मुदत 31 मार्च 2026 रोजी संपत आहे. या अभियानांतर्गत अनेक लोकोपयोगी योजनांची अंमलबजावणी करणे अपेक्षित आहे. मात्र, मुद्रांकशुल्काचा निधी वेळेत वर्ग न झाल्यास या योजनांच्या पूर्ततेत तांत्रिक अडचणी निर्माण होऊन तालुक्यातील ग्रामपंचायती या महत्त्वाकांक्षी अभियानात मागे पडण्याची भीती व्यक्त केली जात आहे.
सभापती युवराज काकडे यांनी जिल्हा परिषदेच्या पंचायत विभागाकडे पाठपुरावा करताना स्पष्ट केले की, ग्रामपंचायतींच्या खात्यावर हा निधी लवकरात लवकर वर्ग झाल्यास मार्चअखेरची धावपळ कमी होईल आणि प्रलंबित कामे वेळेत पूर्ण होतील. उपमुख्यकार्यकारी अधिकारी भूषण जोशी यांनी या निवेदनाची दखल घेऊन सकारात्मक कार्यवाही करण्याचे आश्वासन दिले आहे.
दरम्यान, हवेली तालुक्यातील गावांच्या सर्वांगीण विकासासाठी हक्काचा निधी मिळवण्याकरिता सभापतींनी केलेल्या या प्रयत्नांचे तालुक्यातील सरपंच आणि ग्रामस्थांकडून स्वागत केले जात आहे.
