न्हावरे: शिरूर तालुक्यातील ग्रामीण भागामध्ये जलजीवन मिशन योजनेअंतर्गत सुरू असलेल्या कामांमध्ये अनेक ठिकाणी मोठ्या प्रमाणावर भ्रष्टाचार आणि अनियमितता (Jal jeevan Mission Yojana Corruption) होत असल्याच्या तक्रारी प्राप्त झाल्यामुळे शिरूर पंचायत समितीचे गटविकास अधिकारी महेश डोके यांनी ग्रामीण पाणीपुरवठा व बांधकाम विभागाचे उपअभियंता यांना संबंधित योजनेच्या कामांची सखोल चौकशी करून सविस्तर अहवाल सादर करण्याचे आदेश दिले आहेत.
गटविकास अधिकारी महेश डोके यांनी तालुक्यातील सर्व ग्रामपंचायत अधिकारी आणि ग्रामीण पाणीपुरवठा व बांधकाम विभागाचे उपअभियंता यांना दिलेल्या लेखी आदेशानुसार, तालुक्यातील विविध ग्रामपंचायतींमध्ये जलजीवन मिशन अंतर्गत काम करणाऱ्या ठेकेदारांकडून कामाच्या गुणवत्तेचा अभाव, चुकीच्या ठिकाणी विहिरी खोदणे, पाणीपुरवठा योजनेच्या पाइपलाइन टाकताना ग्रामपंचायत हद्दीतील रस्त्यांची विनापरवाना खोदाई करणे तसेच नियमबाह्य पद्धतीने पाइपलाइन टाकणे अशा प्रकारच्या तक्रारींची पडताळणी करण्याचे निर्देश देण्यात आले आहेत.
या संदर्भात ‘पुणे प्राईम न्यूज’ने जलजीवन मिशनच्या निकृष्ट आणि चुकीच्या कामांविषयी वेळोवेळी आवाज उठवला होता. तसेच शिरूर येथील सामाजिक कार्यकर्ते निलेश वाळूंज यांनी 25 सप्टेंबर रोजी पंचायत समितीचे गटविकास अधिकारी डोके यांच्याकडे याबाबत तक्रार दाखल केली होती. त्यानुसार शिरूर तालुक्यातील अनेक गावांमध्ये जलजीवन मिशन अंतर्गत सुरू असलेल्या कामांमध्ये गंभीर त्रुटी आणि भ्रष्टाचाराचे प्रकार आढळून आल्याचा आरोप करण्यात आला आहे.
या तक्रारीनंतर पंचायत समितीने पाणीपुरवठा विभागाचे उपअभियंता तसेच अभियंता (योजना) यांना चौकशी करून सविस्तर अहवाल सादर करण्याचे आदेश दिले आहेत. नियमांचे उल्लंघन करून जलजीवन मिशनचे काम करणाऱ्या ठेकेदारांवर आवश्यक ती कारवाई करण्यात येईल, असा इशाराही पंचायत समिती प्रशासनाने दिला आहे.
दरम्यान, जलजीवन मिशन योजनेच्या कामांसंदर्भात गटविकास अधिकारी महेश डोके यांनी सांगितले की, “ग्रामपंचायतीच्या मर्यादेत चालणाऱ्या कोणत्याही योजनेत नियमभंग अथवा त्रुटी आढळल्यास जबाबदार अधिकाऱ्यांवर व ठेकेदारांवर कठोर कारवाई करण्यात येईल.”
