उरुळी कांचन, ता. 27 : संतांची पावन भूमी असलेल्या नायगाव (ता. हवेली) येथे ग्रामपंचायत कार्यालयाजवळ नवनिर्मित ‘पूज्य श्री जीवराजजी महाराज सार्वजनिक सभागृह’ आणि जिल्हा परिषद शाळेच्या दोन वर्ग खोल्यांचा लोकार्पण सोहळा मोठ्या उत्साहात पार पडला. पूज्य गौरवमुनीजी महाराज यांच्या मंगल सानिध्यात आणि शिरूर-हवेलीचे आमदार ज्ञानेश्वर उर्फ माऊली आबा कटके यांच्या शुभहस्ते हे उद्घाटन संपन्न झाले.
याप्रसंगी आमदार प्रताप पाटील चिखलीकर, आमदार बाबाजी काळे, माजी आमदार अशोकबापू पवार, उल्हासदादा पवार, ओमप्रकाश पोकर्णा, देविदास भन्साळी, दिलीप वाल्हेकर, पंचायत समितीचे सदस्य कृषिराज चौधरी, हिरामण तात्या काकडे, गुलाब आबा चौधरी, रामदास चौधरी, बाळासाहेब चोरगे, ईश्वर कांकलिया, प्रकाश बोरा, रघुनाथ चौधरी, सुरज चौधरी राजेंद्र कांचन, बाळासाहेब धोका, शिरीष भन्साळी, प्रवीण नहार, महेश भन्साळी यांसह राजकीय, सामाजिक आणि जैन समाजातील अनेक प्रतिष्ठित मान्यवर उपस्थित होते.
उद्घाटनप्रसंगी बोलताना आमदार माऊलीआबा कटके म्हणाले की, “नायगावच्या सर्वांगीण विकासासाठी आणि ग्रामस्थांच्या अडीअडचणी सोडवण्यासाठी मी सदैव तत्पर आहे. येणाऱ्या काळात गावाला आवश्यक असलेली सर्व मदत शासनस्तरावरून मिळवून दिली जाईल.” यावेळी जैन बांधवांच्या प्रतिनिधींनी एक महत्त्वाचा संकल्प सोडला. पूज्य जीवराजजी महाराज यांची जन्मशताब्दी पुढील वर्षी नायगाव येथे अत्यंत भव्य दिव्य स्वरूपात साजरी करण्यात येणार असल्याचे जाहीर करण्यात आले.
कार्यक्रमाला प्रशासक कल्याणी संदीप हगवणे, ग्रामसेविका विजया भगत, जिल्हा परिषद शाळेचे मुख्याध्यापक संजय पवार व सर्व शिक्षक कर्मचारी उपस्थित होते. तसेच गावातील आजी माजी पदाधिकारी यांच्यासह मोठ्या संख्येने ग्रामस्थ आणि महिला भगिनी उपस्थित होत्या. कार्यक्रमाचे स्वागत बाळासाहेब धोका यांनी केले, सूत्रसंचालन महेश लुंकड यांनी केले तर राजेंद्र चौधरी यांनी उपस्थितांचे आभार मानले.
