Loni Kalbhor News लोणी काळभोर, ता. ५ : लोणी काळभोर परिसरात पोलिसांनी टाकलेल्या धाडीत अवैध गावठी हातभट्टी दारूचा मोठा साठा उघडकीस आला आहे. कवडीपाट–कदमवाकवस्ती येथील पत्र्याच्या शेडमध्ये चालणाऱ्या या बेकायदेशीर धंद्यावर पोलिसांनी कारवाई करत तब्बल ३५० लिटर रसायनमिश्रित दारू नष्ट केली असून आई–मुलासह तिघांविरुद्ध गुन्हा दाखल करण्यात आला आहे. Loni Kalbhor News
अक्षय बजरंग मुळेकर (वय २४) आणि त्याची आई मंदा मुळेकर (वय ४७) व दादा खलसे उरुळी कांचन, ता. हवेली) अशी गुन्हा दाखल करण्यात आलेल्या आरोपींची नावे आहेत. याप्रकरणी पोलीस अंमलदार प्रविण दडस यांनी सरकारच्या वतीने लोणी काळभोर पोलीस ठाण्यात फिर्याद दिली आहे. Loni Kalbhor News
लोणी काळभोर पोलिसांनी दिलेल्या माहितीनुसार, पोलीस उपनिरीक्षक दिगांवर सोनटक्के यांच्या मार्गदर्शनाखाली पथकाने मंगळवारी सकाळी साडेअकराच्या सुमारास दत्त पार्क परिसरात छापा टाकला. या छाप्यात अक्षय बजरंग मुळेकर आणि त्याची आई मंदा मुळेकर यांना ताब्यात घेण्यात आले. त्यांच्या ताब्यातून ३५ लिटर क्षमतेच्या १० प्लास्टिक कॅनमध्ये साठवलेली उग्र वासाची, आरोग्यास अत्यंत घातक अशी गावठी दारू आढळून आली. ही दारू रसायन मिसळून तयार करण्यात येत असल्याचे प्राथमिक तपासात निष्पन्न झाले. Loni Kalbhor News
पोलिसांनी कॅनमधील द्रवाची पाहणी केली असता त्यातून तीव्र आंबट वास येत होता. ही दारू मानवी आरोग्यास घातक ठरू शकते, असा अंदाज व्यक्त करण्यात आला. सॅम्पल म्हणून १८० मिली दारू जप्त करून उर्वरित सर्व दारू पंचांसमक्ष जागीच नष्ट करण्यात आली. Loni Kalbhor News
दरम्यान, आरोपींनी ही दारू दादा खलसे (रा. ऊरुळी कांचन) याच्याकडून विकत आणल्याची कबुली दिली आहे. त्यामुळे या प्रकरणात तिसऱ्या आरोपीचाही समावेश करण्यात आला असून, पोलिसांनी त्याचा शोध सुरू केला आहे. या प्रकरणी आरोपींविरुद्ध भारतीय न्याय संहिता कलम १२३, २७४, २७५, ३(५) तसेच महाराष्ट्र दारूबंदी अधिनियम कलम ६५(ई), ५, ६६, ८६ अंतर्गत गुन्हा दाखल करण्यात आला आहे.
पोलिसांची धडक मोहीम; नागरिकांत समाधान
लोणी काळभोर परिसरात अवैध दारूविक्रीविरोधात पोलिसांनी उचललेल्या या धडक पावलामुळे नागरिकांनी समाधान व्यक्त केले आहे. आरोग्यास धोका निर्माण करणाऱ्या अशा बेकायदेशीर धंद्यांवर कठोर कारवाई करण्याची मागणीही जोर धरत आहे.
