पुणे: गणेशोत्सवाच्या पार्श्वभूमीवर पुणे शहरातील मध्यवर्ती भागात होणारी गर्दी लक्षात घेऊन वाहतूक पोलिसांनी जड आणि अवजड वाहनांसाठी महत्त्वाचे निर्बंध लागू केले आहेत. गणेशभक्तांची वाढणारी वर्दळ, गणेश मंडळांची सजावट आणि नागरिकांची गर्दी यामुळे वाहतूक कोंडी होऊ नये तसेच नागरिकांची सुरक्षितता राखता यावी, यासाठी हे निर्बंध घालण्यात आले आहेत. १२ सप्टेंबर ते २६ सप्टेंबर २०२६ या कालावधीत संबंधित रस्त्यांवर जड वाहनांना वाहतुकीस बंदी राहणार आहे.
शास्त्री रोडवर सेनादत्त चौकी चौक ते अलका चौक, टिळक रोडवर जेधे चौक ते अलका चौक, कुमठेकर रोडवर शनिपार ते अलका चौक, लक्ष्मी रोडवर संत कबीर चौक ते अलका चौक आणि केळकर रोडवर फुटका बुरुज ते अलका चौक या मार्गांवर २४ तास जड वाहनांना प्रवेश करता येणार नाही.
तसेच बाजीराव रोडवरील पुरम चौक ते गाडगीळ पुतळा, शिवाजी रोडवरील गाडगीळ पुतळा ते जेधे चौक, कर्वे रोडवरील नळस्टॉप चौक ते खंडोजीबाबा चौक, फर्ग्युसन कॉलेज रोडवरील खंडोजीबाबा चौक ते वीर चाफेकर चौक आणि जंगली महाराज रोडवरील स. गो. बर्वे चौक ते खंडोजीबाबा चौक या मार्गांवरही निर्बंध लागू राहतील.
सिंहगड रोडवरील राजाराम ब्रिज ते सावरकर चौक आणि गणेश रोड व मुदलियार रोडवरील पॉवरहाऊस, दारुवाला पूल, जिजामाता चौक ते फुटका बुरुज चौक या मार्गांचाही निर्बंधित रस्त्यांमध्ये समावेश आहे.
गणेशोत्सव काळात वाहतूक सुरळीत राहावी आणि नागरिकांना तसेच गणेशभक्तांना कोणताही त्रास होऊ नये, यासाठी वाहनचालकांनी पर्यायी मार्गांचा वापर करावा, असे आवाहन पुणे शहर वाहतूक पोलिसांनी केले आहे. नागरिकांनीही प्रशासनाला सहकार्य करून विनाकारण वाहतूक कोंडी होणार नाही, याची काळजी घ्यावी, असे आवाहन करण्यात आले आहे.
