Good News पुणे, ता. ५ : शहरातील चंदननगर पोलिसांनी दाखवलेल्या तत्परतेमुळे हरवलेला मोबाईल अवघ्या २० मिनिटांत मालकिणीच्या हाती परत आला. सीसीटीव्ही तंत्रज्ञानाचा अचूक वापर आणि जलद प्रतिसाद यामुळे ही कारवाई यशस्वी ठरली असून, पुणे पोलिसांच्या कार्यक्षमतेचे कौतुक होत आहे. Good News
पोलिसांनी दिलेल्या माहितीनुसार, काजल महेंद्र परिहार (रा. आनंद पार्क, वडगावशेरी) या रिक्षातून फिनिक्स मॉलकडे जात असताना त्यांचा मोबाईल रिक्षामध्येच पडला. मॉलमध्ये पोहोचल्यानंतर मोबाईल नसल्याचे लक्षात येताच त्यांनी तात्काळ ‘डायल 112’ या आपत्कालीन क्रमांकावर संपर्क साधून मदत मागितली. Good News
यानंतर त्या महात्मा फुले चौकी येथे पोहोचल्या. या वेळी चंदननगर पोलिस ठाण्यातील मार्शल ड्युटीवरील पोलीस कर्मचारी अमोल ढाकणे आणि रोहित सूर्यवंशी यांनी तातडीने कारवाई सुरू केली. वरिष्ठ पोलीस निरीक्षक निलेश बडाख यांच्या मार्गदर्शनाखाली संबंधित मार्गावरील सीसीटीव्ही फुटेज तपासण्यात आले. Good News
सीसीटीव्हीच्या आधारे संबंधित रिक्षाचा क्रमांक शोधण्यात आला. त्यावरून रिक्षाचालकाचा मोबाईल नंबर मिळवत पोलिसांनी त्याच्याशी संपर्क साधला. परिस्थिती समजावून सांगताच रिक्षाचालकाने प्रामाणिकपणे मोबाईल परत देण्यास सहमती दर्शवली. अवघ्या २० मिनिटांत पोलिसांनी हरवलेला मोबाईल शोधून काढत तो सुरक्षितपणे श्रीमती परिहार यांच्या ताब्यात दिला. या वेगवान आणि प्रभावी कारवाईमुळे त्यांनी पुणे पोलिसांचे मनापासून आभार मानले.
दरम्यान, या घटनेतून शहरातील सीसीटीव्ही यंत्रणा आणि ‘डायल 112’ सेवेमुळे नागरिकांना मिळणारी तात्काळ मदत पुन्हा अधोरेखित झाली आहे. पुणे पोलिसांची ही कामगिरी ‘स्मार्ट आणि जबाबदार पोलिसिंग’चे उत्तम उदाहरण ठरत आहे.
