पुणे: पुणे जिल्ह्यातील बारामती तालुक्यात एक हृदयद्रावक अपघात घडला असून, घरापासून अवघ्या काही मिनिटांच्या अंतरावर दोन सख्ख्या भावांच्या मोटारसायकलला भरधाव ट्रकने जोरदार धडक दिली. या भीषण अपघातात एका भावाचा जागीच मृत्यू झाला, तर दुसरा भाऊ गंभीर जखमी झाला असून त्याच्यावर रुग्णालयात उपचार सुरू आहेत. या घटनेमुळे सुपे परिसरात शोककळा पसरली आहे.
मिळालेल्या माहितीनुसार, दोन्ही भाऊ कामानिमित्त मोरगाव येथे गेले होते. दिवसभराचे काम आटोपल्यानंतर ते मोटारसायकलवरून सुपे येथील आपल्या घरी परतत होते. घर अवघे दोन ते तीन मिनिटांच्या अंतरावर असताना चौफुला बाजूकडून भरधाव वेगाने येणाऱ्या ट्रकने त्यांच्या मोटारसायकलला जोरदार धडक दिली. धडक इतकी भीषण होती की मोटारसायकल थेट ट्रकखाली गेली.
अपघातात एका भावाचा घटनास्थळीच मृत्यू झाला. दुसरा भाऊ गंभीर जखमी झाल्याने त्याला तातडीने जवळच्या रुग्णालयात दाखल करण्यात आले. त्याच्यावर उपचार सुरू असून त्याची प्रकृती चिंताजनक असल्याची माहिती समोर आली आहे.
या अपघाताची संपूर्ण घटना परिसरातील सीसीटीव्ही कॅमेऱ्यात कैद झाली आहे. या फुटेजच्या आधारे पोलिसांनी अपघाताचा तपास सुरू केला असून, ट्रकचालकाच्या निष्काळजीपणामुळे ही दुर्घटना घडली का, याचा तपास केला जात आहे.
घटनेची माहिती मिळताच स्थानिक नागरिकांनी घटनास्थळी धाव घेत मदतकार्य सुरू केले. त्यानंतर पोलिसांनी पंचनामा करून पुढील कायदेशीर प्रक्रिया सुरू केली आहे.
दरम्यान, घराच्या उंबरठ्यावर पोहोचण्याआधीच झालेल्या या दुर्दैवी अपघातामुळे परिसरात हळहळ व्यक्त केली जात आहे. एका कुटुंबाचा आधार हिरावून नेणाऱ्या या घटनेमुळे नागरिकांनीही भरधाव वाहनांवर नियंत्रण ठेवण्यासाठी आणि रस्ते सुरक्षेच्या नियमांची कठोर अंमलबजावणी करण्याची मागणी केली आहे.
