मुंबई: केंद्रीय शिक्षणमंत्री धर्मेंद्र प्रधान यांच्या राजीनाम्यानंतर देशातील राजकारण पुन्हा तापले असून, आता केंद्रीय रस्ते वाहतूक आणि महामार्ग मंत्री नितीन गडकरी यांच्यावरही विरोधकांनी निशाणा साधला आहे. महाराष्ट्र काँग्रेसचे प्रदेशाध्यक्ष हर्षवर्धन सपकाळ यांनी इथेनॉल मिश्रित इंधन धोरणावर टीका करत नितीन गडकरी यांनीही राजीनामा द्यावा, अशी मागणी केली आहे.
प्रसारमाध्यमांशी संवाद साधताना सपकाळ म्हणाले की, इथेनॉलयुक्त पेट्रोल आणि डिझेलमुळे सर्वसामान्यांच्या वाहनांचे नुकसान होत असल्याच्या तक्रारी समोर येत आहेत. एका बाजूला वाहनधारकांना आर्थिक फटका बसत असताना, दुसऱ्या बाजूला इथेनॉल उत्पादनाशी संबंधित कंपन्यांना मोठा आर्थिक लाभ झाल्याचा आरोप त्यांनी केला. या संपूर्ण प्रकरणाची सखोल चौकशी होणे आवश्यक असून, केंद्र सरकारने याबाबत स्पष्ट भूमिका घ्यावी, अशी मागणीही त्यांनी केली.
सपकाळ यांनी पुढे आरोप केला की, इथेनॉल धोरणामुळे नागरिकांना त्रास सहन करावा लागत आहे. या प्रकरणात नैतिक जबाबदारी स्वीकारून पंतप्रधान नरेंद्र मोदी यांनी वाहनधारकांची माफी मागावी आणि केंद्रीय मंत्री नितीन गडकरी यांनी तत्काळ आपल्या पदाचा राजीनामा द्यावा, अशी मागणी त्यांनी केली.
दरम्यान, धर्मेंद्र प्रधान यांच्या राजीनाम्यानंतर देशातील राजकीय घडामोडींना वेग आला असून, विविध विरोधी पक्षांकडून केंद्र सरकारवर सातत्याने टीका केली जात आहे. याच पार्श्वभूमीवर विविध राजकीय पक्षांकडून पुढील भूमिका काय असेल, याकडे लक्ष लागले आहे.
मुंबईत आयोजित करण्यात आलेल्या ‘तिरंगा’ रॅलीत शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांनीही केंद्र सरकारच्या धोरणांवर टीका केली. त्यांच्या वक्तव्यानंतर केंद्रीय मंत्री नितीन गडकरी पुन्हा एकदा राजकीय चर्चेच्या केंद्रस्थानी आले आहेत. दरम्यान, हर्षवर्धन सपकाळ यांनी केलेल्या आरोपांवर किंवा राजीनाम्याच्या मागणीवर नितीन गडकरी किंवा केंद्र सरकारकडून अधिकृत प्रतिक्रिया अद्याप समोर आलेली नाही.
