मी ‘रॉ’चा माणूस आहे म्हणत फसवलं! व्यापाऱ्याचे बँक खाते फ्रीज करून लाखांची खंडणी उकळणारा तोतया जेरबंद

पुणे: गुजरातमधील राजकोट येथील एका धान्य व्यापाऱ्याला ‘रॉ’ (RAW) अधिकारी असल्याची बतावणी करून लाखो रुपयांची खंडणी मागितल्याचा धक्कादायक प्रकार उघडकीस आला आहे. व्यापाऱ्याचे बँक खाते ऑनलाइन व्यवहारातून गोठवण्यात आल्यानंतर ते पुन्हा सुरू करून देण्याच्या नावाखाली मोठी रक्कम उकळण्याचा प्रयत्न करण्यात आल्याचा आरोप आहे. या प्रकरणी पुणे पोलिसांच्या गुन्हे शाखेच्या खंडणीविरोधी पथकाने कारवाई करत परेश प्रवीण कोठारी (रा. सातारा रोड, पुणे) याच्याविरुद्ध पर्वती पोलीस ठाण्यात गुन्हा दाखल केला असून त्याला सापळा रचून अटक करण्यात आली आहे.

पोलिसांनी दिलेल्या माहितीनुसार, ९ मार्च रोजी रात्री राजकोटमधील व्यापाऱ्याच्या बँक ऑफ बडोदा खात्यात वेगवेगळ्या खात्यांतून ₹१,००० चे दोन आणि ₹२,००० चा एक असे एकूण ₹४,००० जमा झाले. त्यानंतर संबंधित बँक खाते गोठवण्यात आले. याबाबत चौकशी केली असता ही रक्कम पुण्यातील धनकवडी परिसरातील दोन खात्यांतून जमा झाल्याचे समोर आले.

यानंतर व्यापाऱ्याने संबंधित मोबाईल क्रमांकावर संपर्क साधला. व्हॉट्सअॅप कॉलवर समोरच्या व्यक्तीने स्वतःची ओळख ‘रॉ’ अधिकारी अशी करून दिली. त्याने अनेकांची बँक खाती अशाच पद्धतीने गोठविल्याचा दावा करत खाते पुन्हा सुरू करण्यासाठी सुरुवातीला ₹५ लाखांची मागणी केली. नंतर ही रक्कम सुमारे ₹४.२५ लाखांवर ठरल्याचा आरोप तक्रारीत करण्यात आला आहे. पैसे न दिल्यास गंभीर परिणाम भोगावे लागतील, अशी धमकीही व्यापाऱ्याला देण्यात आल्याचे पोलिसांनी सांगितले.

 

जून महिन्यात व्यापाऱ्याने पुण्यातील सातारा रस्त्यावरील एका कॅफेमध्ये संबंधित व्यक्तीची भेट घेतली. त्या वेळी त्याने ‘पोलिस मित्र’ असे लिहिलेले ओळखपत्र दाखवून स्वतःचे नाव परेश कोठारी असल्याचे सांगितल्याचा दावा तक्रारदाराने केला आहे. बैठकीतही खाते सुरू करून देण्यासाठी पैशांची मागणी करण्यात आल्याचे तक्रारीत नमूद आहे.

यानंतर व्यापाऱ्याने कायदेशीर सल्ला घेत १३ जुलै रोजी पुणे गुन्हे शाखेकडे लेखी तक्रार दाखल केली. तक्रारीनंतरही व्हॉट्सअॅप संदेश आणि फोनद्वारे धमक्या मिळत राहिल्याचे त्याने पोलिसांना सांगितले. तपासादरम्यान खंडणी मागितल्याचे प्राथमिक निष्पन्न झाल्यानंतर गुन्हे शाखेच्या खंडणीविरोधी पथकाने सातारा रस्त्यावरील पंचमी चौक परिसरात सापळा रचला. शुक्रवारी सायंकाळी खंडणीची रक्कम स्वीकारण्यासाठी आलेल्या परेश कोठारीला पोलिसांनी रंगेहात ताब्यात घेतले असून, पुढील तपास सुरू आहे.