बारामती, (पुणे) : कोणताही अधिकृत परवाना नसताना व्यावसायिक आणि हाय-प्रोफाइल फॅन्सी फटाक्यांची बेकायदेशीर वाहतूक करणाऱ्या चार जणांना बारामती शहर पोलिसांनी वाहनांसह ताब्यात घेतले आहे. उपविभागीय पोलीस अधिकारी कार्यालयाच्या पथकाने फलटण-बारामती रोडवर मळद गावच्या हद्दीतील चिंचबनजवळ मंगळवारी (ता. 16 दुपारी तीन वाजण्याच्या सुमारास हि कारवाई करण्यात आली.
सोमनाथ सदाशिव होले (वय 54, रा. खंडोबानगर बारामती ता बारामती) संदिप युवराज नेटके (वय 33, रा. साठेनगर कसबा बारामती ता. बारामती) गणेश बाबासाहेब गरगडे (वय 32, रा. गुणवरे ता. फलटण जि सातारा) व सुरेश बापूराव गवारे (वय 60, रा. देसाई इस्टेट बारामती ता. बारामती) असे गुन्हा दाखल करण्यात आलेल्या चौघांची नावे आहेत. यांच्याकडून वाहनासह तब्बल 7 लाख 79 हजार 628 रुपयांचा मुद्देमाल जप्त करण्यात आला आहे. याबाबत पोलीस हवालदार वैभव भगवान साळवे यांनी याप्रकरणी बारामती शहर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, मंगळवारी (ता. 16 दुपारी तीन वाजण्याच्या सुमारास पोलीस हवालदार वैभव साळवे हे पथकासह मळद परिसरात गस्तीवर होते. त्याच वेळी फलटणकडून बारामतीच्या दिशेने काही संशयास्पद वाहने येत असल्याची माहिती पोलिसांना मिळाली. त्यानुसार पोलिसांनी चिंचबनजवळ नाकाबंदी लावली.
पोलिसांनी समोरून येणाऱ्या दोन पियाजिओ तीन चाकी टेम्पो, एक महिंद्रा विप्रो आणि एका अशोक लेलंड छोटा हत्ती गाडीला थांबवून तपासणी केली असता, या चारही गाड्यांमध्ये स्फोटक आणि अत्यंत ज्वलनशील असलेल्या फॅन्सी फटाक्यांचे शेकडो बॉक्सेस खच्चून भरलेले होते. यामध्ये ‘ताजमहाल किंग’ ‘इम्पेरियल रेड बिजली’ अशा विविध नामांकित कंपनीचे फटाक्यांचे मोठे बॉक्स होते. याप्रकरणी चौघांवर बारामती शहर पोलीस ठाण्यात गुन्हा दाखल करण्यात आला असून तपास पोलीस उपनिरीक्षक भंडारे हे करत आहेत
