पुणे: पुण्यातील शिवाजीनगर परिसरातील दोन हॉटेलांमध्ये सुरू असलेल्या कथित देहविक्रयाच्या प्रकारावर गुन्हे शाखेच्या अनैतिक मानवी वाहतूक प्रतिबंधक पथकाने (AHTU) कारवाई करत 3 महिलांना ताब्यात घेतले आहे. यामध्ये एका परदेशी तरुणीचाही समावेश असून या प्रकरणी दोन दलालांविरोधात गुन्हा दाखल करण्यात आला आहे.
पोलिसांना शिवाजीनगरमधील एसटी स्थानक परिसरातील एका हॉटेलमध्ये देहविक्रय सुरू असल्याची गुप्त माहिती मिळाली होती. त्यानंतर अनैतिक मानवी वाहतूक प्रतिबंधक पथकाने बनावट ग्राहकाच्या माध्यमातून माहितीची खातरजमा केली. संशयाची खात्री झाल्यानंतर पोलिसांनी संबंधित हॉटेलवर छापा टाकला.
या कारवाईदरम्यान परराज्यातील एका तरुणीला ताब्यात घेण्यात आले. पुढील तपासात सेनापती बापट रस्त्यावरील आणखी एका हॉटेलमध्ये काही महिलांना देहविक्रयासाठी आणल्याची माहिती पोलिसांना मिळाली. त्यानुसार पथकाने तातडीने दुसऱ्या हॉटेलवरही छापा टाकला.
या छाप्यात एका परदेशी तरुणीसह आणखी दोन महिलांना ताब्यात घेण्यात आले. प्राथमिक तपासात संबंधित महिलांना देहविक्रयासाठी प्रवृत्त करण्यात आल्याचे निष्पन्न झाल्याने दोन दलालांविरोधात कारवाई करण्यात आली आहे.
याप्रकरणी शिवाजीनगर पोलीस ठाण्यात अनैतिक मानवी वाहतूक (प्रतिबंध) अधिनियमांतर्गत गुन्हा दाखल करण्यात आला असून पुढील तपास सुरू आहे.
ही कारवाई गुन्हे शाखेच्या अतिरिक्त पोलीस आयुक्त तेजस्वी सातपुते, पोलीस उपायुक्त गौहर हसन आणि सहायक पोलीस आयुक्त विजय कुंभार यांच्या मार्गदर्शनाखाली करण्यात आली. वरिष्ठ पोलीस निरीक्षक विजय कुंभार यांच्या नेतृत्वाखाली ईश्वर आंधळे, तुषार भिवररकर, अमेय रसाळ, अविनाश शिंदे, जाधव तसेच महिला पोलीस कर्मचारी खेडेकर, इंगळे आणि रेश्मा कंक यांनी या मोहिमेत सहभाग घेतला.
