पुणे: पुणे रेल्वे स्थानकावरील वाढता ताण कमी करण्यासाठी आणि आळंदीला येणाऱ्या वारकऱ्यांसाठी अधिक सुविधा उपलब्ध करून देण्यासाठी आळंदी (म्हातोबाची, ता. हवेली) येथे अत्याधुनिक मेगा कोचिंग टर्मिनल उभारण्याचा महत्त्वाचा निर्णय घेण्यात आला आहे. केंद्रीय रेल्वेमंत्री अश्विनी वैष्णव यांनी या प्रकल्पाची माहिती देताना पुढील 3 वर्षांत हे काम पूर्ण करण्याचे नियोजन असल्याचे सांगितले.
या प्रस्तावित टर्मिनलमध्ये 9 प्लॅटफॉर्म, 7 पिटलाइन आणि 17 स्टेबलिंग लाइन उभारण्यात येणार आहेत. येथे रेल्वे गाड्यांची स्वच्छता, देखभाल आणि तांत्रिक कामे केली जाणार असल्यामुळे पुणे रेल्वे स्थानकावरील कामाचा मोठा भार कमी होण्यास मदत होणार आहे.
दरम्यान, पुणे रेल्वे स्थानकाचा विस्तार करण्याचाही निर्णय घेण्यात आला आहे. सध्या असलेले 6 प्लॅटफॉर्म वाढत्या प्रवासी संख्येसाठी अपुरे पडत असल्याने आणखी 6 नवीन प्लॅटफॉर्म उभारले जाणार आहेत. त्यामुळे पुणे स्थानकावरील प्लॅटफॉर्मची एकूण संख्या 12 होणार आहे.
रेल्वे व्यवस्थेचे आधुनिकीकरण करण्यासाठी जुन्या रूट रिले इंटरलॉकिंग प्रणालीच्या जागी अत्याधुनिक इलेक्ट्रॉनिक इंटरलॉकिंग यंत्रणा बसवण्यात येणार आहे. यामुळे रेल्वे वाहतूक अधिक सुरक्षित, वेगवान आणि डिजिटल पद्धतीने नियंत्रित करता येणार आहे.
याच कार्यक्रमात रेल्वेमंत्री अश्विनी वैष्णव यांनी पुणे-शिर्डी नवीन रेल्वेला हिरवा झेंडा दाखवला. तसेच हडपसर ते दानापूर अमृत भारत एक्स्प्रेस सेवेलाही प्रारंभ करण्यात आला.
यावेळी पुणे-मुंबई दरम्यान तिसरी आणि चौथी रेल्वे लाईन उभारण्याच्या कामालाही गती दिली जाणार असल्याची माहिती देण्यात आली. भविष्यात बुलेट ट्रेन प्रकल्पामुळे पुणे ते मुंबई प्रवास अवघ्या 48 मिनिटांत, तर पुणे ते हैदराबाद प्रवास सुमारे 2 तासांत पूर्ण होऊ शकणार असल्याचे सांगण्यात आले.
रेल्वे क्षेत्राच्या विकासासाठी 2024 नंतर मोठ्या प्रमाणावर गुंतवणूक करण्यात आली असून महाराष्ट्रासाठी सुमारे 24 हजार कोटी रुपयांचा निधी उपलब्ध करून देण्यात आल्याची माहितीही रेल्वेमंत्र्यांनी दिली.
