पुणे: हडपसर परिसरात प्रेमसंबंधातून निर्माण झालेल्या वादाला दुःखद वळण लागले आहे. 19 वर्षीय तरुणीने राहत्या घरी आत्महत्या केल्याची घटना समोर आली असून, या प्रकरणी तिच्या प्रियकराला पोलिसांनी अटक केली आहे. प्रियकराकडून मानसिक त्रास दिला जात असल्याच्या तक्रारीनंतर ही कारवाई करण्यात आली.
माळवाडी, हडपसर येथे राहणाऱ्या पूजा बाबासाहेब नागरगोजे हिचा अतुल महादेव तांबे याच्यासोबत प्रेमसंबंध होता. अतुलने पूजाशी लग्न करण्याचे आश्वासन दिल्याचे सांगण्यात येते. मात्र, पूजाला एका आजाराचे निदान झाल्यानंतर परिस्थिती बदलली.
आजाराची माहिती मिळाल्यानंतर अतुलच्या वागण्यात बदल झाल्याचा आरोप आहे. त्याने पूजाच्या चारित्र्यावर संशय घेण्यास सुरुवात केली. त्यातून तिच्यावर मानसिक दबाव वाढत गेला. पुढे अतुलने लग्न करण्यास नकार दिल्याचेही तक्रारीत नमूद करण्यात आले आहे. या सततच्या त्रासामुळे पूजा मानसिकदृष्ट्या खचली होती. अखेर तिने आपल्या राहत्या घरी आत्महत्या केली. घटनेची माहिती मिळाल्यानंतर परिसरात हळहळ व्यक्त करण्यात आली.
या घटनेनंतर पूजाचे वडील बाबासाहेब वामन नागरगोजे यांनी हडपसर पोलीस ठाण्यात तक्रार दाखल केली. त्यांनी मुलीला मानसिक त्रास देऊन आत्महत्येस प्रवृत्त केल्याचा आरोप अतुल तांबे याच्यावर केला.
तक्रार मिळताच हडपसर पोलिसांनी प्रकरणाची चौकशी सुरू केली. प्राथमिक तपास आणि तक्रारीच्या आधारे अतुल महादेव तांबे याच्याविरोधात आत्महत्येस प्रवृत्त केल्याप्रकरणी गुन्हा दाखल करत त्याला अटक केली आहे. दरम्यान, याप्रकरणी पोलिस अधिक तपास करत आहेत.
