लोणी काळभोर, ता. 29: थेऊर फाट्याजवळील पुलाच्या परिसरात गांजा विक्रीसाठी घेऊन आलेल्या 19 वर्षीय तरुणाला लोणी काळभोर पोलिसांनी 28 ऑगस्ट रोजी रात्री साडेअकराच्या सुमारासअटक केली. त्याच्याकडून 1 हजार 144 ग्रॅम गांजा, सुझुकी अॅक्सेस मोपेड आणि मोबाईल फोन असा एकूण 1 लाख 15 हजार रुपयांचा मुद्देमाल जप्त करण्यात आला आहे.
रोहन लक्ष्मण थोरात (वय 19, रा. माळीमळा, लोणी काळभोर) असे अटक केलेल्या आरोपीचे नाव आहे. तर सतीश ऊर्फ सत्या विठ्ठल चव्हाण (रा. धुमाळ मळा, लोणी काळभोर) याचेही या प्रकरणात नाव समोर आले आहे. याप्रकरणी पोलीस अंमलदार सागर गणपत धायतोंडे यांनी सरकारतर्फे लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, थेऊर फाट्याजवळील पुल परिसरात लोणी काळभोर पोलिसांना रोहन थोरात हा गांजा विक्रीच्या उद्देशाने बाळगताना आढळून आला. त्याच्याकडून 55 हजार रुपये किमतीचा 1 किलो 144 ग्रॅम गांजा, 50 हजार रुपये किमतीची मोपेड आणि 10 हजार रुपये किमतीचा ओप्पो मोबाईल असा मुद्देमाल जप्त करण्यात आला.
याप्रकरणी लोणी काळभोर पोलीस ठाण्यात एनडीपीएस कायद्यान्वये गुन्हा दाखल करण्यात आला असून, गांजा पुरवठा करणाऱ्या सतीश ऊर्फ सत्या चव्हाण याचाही शोध घेतला जात आहे.पुढील तपास लोणी काळभोर पोलीस ठाण्याचे सहाय्यक पोलीस निरीक्षक अरुण जाधव करत आहेत.
