पुणे: पत्नीला दुसऱ्या पुरुषासोबत दुचाकीवरून जाताना पाहिल्यानंतर तिला रस्त्यात अडवणाऱ्या रिक्षाचालकासोबतच धक्कादायक प्रकार घडल्याचे समोर आले आहे. पत्नीच्या प्रियकराने आणि त्याच्या मामाने रिक्षाचालकाला मारहाण केल्याचा आरोप आहे. एवढेच नाही, तर त्याच्या खिशातील रोख रक्कम जबरदस्तीने काढून घेतल्याचेही तक्रारीत नमूद आहे. या प्रकरणी गुन्हे शाखेच्या युनिट 4 ने दोघांना अटक केली आहे.
ही घटना पुण्यातील लोहगाव परिसराशी संबंधित आहे. संबंधित पती रिक्षाचालकाने पत्नीला एका व्यक्तीसोबत मोटरसायकलवरून जाताना पाहिले. त्यानंतर त्याने दोघांना रस्त्यात थांबवून जाब विचारला. यावेळी झालेल्या वादाचे रुपांतर मारामारीत झाले. प्रियकर आणि त्याच्या मामाने मिळून रिक्षाचालकाला मारहाण केल्याचा आरोप आहे.
हल्ल्यानंतर दोघांनी रिक्षाचालकाच्या खिशातून पैसे काढून घेतल्याचेही पोलिसांना सांगण्यात आले. घटनेनंतर पतीने लोहगाव पोलीस ठाण्यात तक्रार नोंदवली. त्यानुसार पोलिसांनी आरोपींचा शोध सुरू केला. पोलिसांनी चौकशी करून राजू तिमय्या राव उर्फ धोत्रे आणि गणेश अशोक रेड्डी, वय 36, यांना ताब्यात घेण्यात आले असून अधिक तपास सुरु आहे.
