पुणे : डेटिंग ॲपच्या माध्यमातून झालेली ओळख एका तरुणासाठी त्रासदायक ठरल्याची धक्कादायक घटना पुण्यातील खराडी परिसरात समोर आली आहे. ड्रग्जच्या खोट्या प्रकरणात अडकवण्याची आणि बदनामी करण्याची धमकी दिल्याचा आरोप या प्रकरणात करण्यात आला आहे. या त्रासामुळे 22 वर्षीय आयटी कर्मचाऱ्याने इमारतीच्या 27 व्या मजल्यावरून उडी मारून आत्महत्या केल्याची माहिती आहे. याप्रकरणी अजयकुमार भाटिया याच्याविरोधात पोलिसांनी आत्महत्येस प्रवृत्त केल्याचा गुन्हा दाखल केला आहे.
मृत तरुणाचे नाव शिखर कुमार गौरव सक्सेना (वय 22) असे आहे. तो मूळचा उत्तराखंडचा रहिवासी होता. पुण्यातील एका नामांकित आयटी कंपनीत तो काम करत होता. खराडी येथील रिव्हरडेल सुइट्स सोसायटीमध्ये तो राहत होता. त्याचे वडील उत्तराखंडमध्ये सरकारी नोकरी करतात.
पोलिसांनी दिलेल्या माहितीनुसार, डेटिंग ॲपच्या माध्यमातून शिखरची एका व्यक्तीशी ओळख झाली होती. या व्यक्तीने त्याला ड्रग्जच्या खोट्या गुन्ह्यात अडकवण्याची तसेच त्याची बदनामी करण्याची धमकी दिल्याचा आरोप आहे. या प्रकारामुळे शिखर मानसिक तणावात होता. अखेर 1 ऑक्टोबर रोजी त्याने इमारतीवरून उडी मारली. या घटनेत त्याचा मृत्यू झाला.
शिखरच्या मृत्यूमागचे नेमके कारण सुरुवातीला स्पष्ट झाले नव्हते. कुटुंबीयांनी दुःखद वातावरणात त्याच्यावर अंत्यसंस्कार केले. मात्र, त्यानंतर शिखरच्या वडिलांना एका अज्ञात व्यक्तीचा फोन आला. त्यांच्या मुलाने बेकायदेशीर कृत्य केल्याचा दावा करत, पैसे न दिल्यास त्याची माहिती उघड करण्याची धमकी फोन करणाऱ्या व्यक्तीने दिल्याचे सांगितले जाते.
या प्रकारानंतर कुटुंबीयांनी पोलिसांकडे तक्रार केली. तक्रारीच्या आधारे पोलिसांनी तपास सुरू केला असून, अजयकुमार भाटिया याच्याविरोधात गुन्हा नोंदवण्यात आला आहे. या प्रकरणातील धमक्या, पैशांची मागणी आणि आरोपीची भूमिका याबाबत पुढील तपास सुरू आहे.
