उरुळी कांचन, (पुणे) : केडगाव येथील ‘लवंगारे मॅटर्निटी अँड इन्फर्टिलिटी हॉस्पिटल’मध्ये कोणत्याही प्रकारचा कायदेशीर अधिकार नसताना आणि स्वतः स्त्रीरोगतज्ज्ञ नसतानाही, गर्भपाताच्या गोळ्यांचा बेकायदेशीर साठा करून गर्भपात केला जात असल्याचा खळबळजनक पर्दाफाश झाला आहे. याप्रकरणी केडगाव येथील एका महिला डॉक्टरवर तर उरुळी कांचन येथील एका डॉक्टरवर यवत पोलीस ठाण्यात गुन्हा दाखल करण्यात आला आहे. याबाबत डॉ. सचिन विठ्ठल गुजर, (वय 40, व्यवसाय नोकरी, वैद्यकिय अधिक्षक, उपजिल्हा रुग्नालय, दौंड), यांनी यवत पोलीस्त ठाण्यात फिर्याद दिली आहे.
डॉ. तुकाराम यशवंत मोटे, माहेर हॉस्पिटल शिवकृपा मार्केट शेजारी रा. उरुळी कांचन, ता. हवेली) व डॉ. स्वाती लवंगारे (पुर्ण नाव माहित नाही लवंगारे मॅटर्निटी अँन्ड इन्फर्टिलीटी हॉस्पिटल, केडगाव, ता. दौंड) रा. केडगाव ता. दौंड जि. पुणे, अशी गुन्हा दाखल करण्यात आलेल्या दोघांची नावे आहेत. केडगाव येथील लवंगारे हॉस्पिटलमध्ये स्त्रीरोगतज्ज्ञ नसताना चालणाऱ्या या काळ्या धंद्याला उरुळी कांचन येथील ‘माहेर हॉस्पिटल’चे डॉ. तुकाराम मोटे हे गर्भपाताच्या गोळ्या पुरवून पाठबळ देत असल्याचे पोलीस तपासात उघड झाले आहे.
पोलिसांनी दिलेल्या माहितीनुसार, फिर्यादी डॉ. सचिन गुजर यांना केडगाव येथील लवंगारे हॉस्पिटलमध्ये अवैध कृत्य सुरू असल्याची खात्रीशीर माहिती मिळाली होती. त्यानुसार शासकीय पथकाने शनिवारी (ता. 06) दुपारी ठीक पाऊणे दोन वाजण्याच्या सुमारास ‘लवंगारे हॉस्पिटल’ येथे अचानक धाड टाकली.
या हॉस्पिटलच्या मुख्य डॉक्टर डॉ. स्वाती लवंगारे ह्या अधिकृत स्त्रीरोगतज्ज्ञ नाहीत, तसेच त्यांना वैद्यकीय कायद्यानुसार गर्भपात करण्याचा कोणताही कायदेशीर अधिकार नाही. असे असतानाही त्यांनी आपल्या हॉस्पिटलमध्ये गर्भपाताच्या गोळ्यांचा मोठा साठा बेकायदेशीररित्या करून ठेवला होता आणि त्याद्वारे त्या महिलांचे अवैध गर्भपात करत असल्याचे रंगेहात उघड झाले.
या गुन्ह्याचा तपास करत असताना या हॉस्पिटलमध्ये बेकायदेशीर गर्भपातासाठी लागणाऱ्या गोळ्या रुग्णांना पुरवण्यामागे उरुळी कांचन येथील डॉ. तुकाराम यशवंत मोटे यांचा मुख्य हात असल्याचे समोर आले आहे. हॉस्पिटलमधील अधिकृत रेकॉर्ड आणि मेडिकल रजिस्टर तपासले असता, डॉ. तुकाराम मोटे यांच्या नावाने व सहीने या गर्भपाताच्या गोळ्या रुग्णांना दिल्या गेल्याची स्पष्ट नोंद आढळून आली आहे.
दरम्यान, डॉ. स्वाती लवंगारे व डॉ. तुकाराम यशवंत मोटे यांच्याविरुद्ध विविध कलमांन्वये गुन्हा नोंदवण्यात आला आहे. तपास पोलीस उपनिरीक्षक किशोर वागज हे करीत आहेत.
