पुणे: पुण्यातील खराडी परिसरात नामांकित आयटी कंपन्यांमध्ये नोकरी मिळवून देण्याचे आमिष दाखवत बेरोजगार तरुण-तरुणींची लाखो रुपयांची फसवणूक केल्याचा प्रकार उघडकीस आला आहे. या प्रकरणी एका 27 वर्षीय तरुणीच्या तक्रारीवरून खराडी पोलीस ठाण्यात कंपनीच्या मालकासह अन्य पदाधिकाऱ्यांविरोधात गुन्हा दाखल करण्यात आला आहे.
पोलिसांच्या माहितीनुसार, Radiant Edutech LLP या कंपनीचे मालक सैफ वाहिद मनियार (वय 31), एक्झिक्युटिव्ह मॅनेजर समीत सुराणा, फायनान्स मॅनेजर वैभव दुबेवार, गीतेश कुंबलकर (वय 25) आणि इतर संचालकांविरोधात फसवणुकीचा गुन्हा नोंदवण्यात आला आहे. जून 2025 ते 30 मार्च 2026 या कालावधीत हा प्रकार घडल्याचे तपासात समोर आले आहे.
आरोपींनी बेरोजगार तरुणांना मोठ्या आयटी कंपन्यांमध्ये नोकरी मिळवून देण्याचे आश्वासन देत कंपनीत नोंदणी करण्यास सांगितले. त्यासाठी उमेदवारांकडून हजारो रुपयांची फी आकारण्यात आली. तक्रारदार तरुणीकडून सुमारे 1 लाख 90 हजार रुपये घेण्यात आल्याचे समोर आले आहे. तसेच इतर अनेक उमेदवारांकडूनही मोठ्या प्रमाणात पैसे उकळल्याचा आरोप आहे.
पोलिसांच्या माहितीनुसार, उमेदवारांचा विश्वास जिंकण्यासाठी सुरुवातीला त्यांना काम दिल्याचे भासवण्यात आले. इतकेच नव्हे तर काही जणांच्या खात्यात तीन महिन्यांचा पगारही जमा करण्यात आला. त्यामुळे उमेदवारांचा कंपनीवर विश्वास बसला. मात्र, नंतर अचानक पगार देणे बंद करण्यात आले आणि कायमस्वरूपी नोकरीचे आश्वासनही पूर्ण करण्यात आले नाही.
फसवणुकीची जाणीव झाल्यानंतर पीडितांनी पोलिसांकडे धाव घेतली. प्राथमिक तपासात या प्रकरणात एकूण 43 लाख 62 हजार रुपयांची फसवणूक झाल्याचे समोर आले आहे. या रॅकेटमध्ये आणखी किती जणांची फसवणूक झाली आहे, याचा शोध पोलिस घेत आहेत.
या प्रकरणात अद्याप कोणालाही अटक करण्यात आलेली नसली तरी पोलिसांकडून आरोपींचा शोध सुरू आहे. तसेच नोकरीच्या आमिषाने पैसे मागणाऱ्या अनधिकृत संस्था किंवा एजन्सींपासून सावध राहण्याचे आवाहन पोलिसांनी केले आहे.
