लोणी काळभोर : हवेली तालुक्यातील थेऊर येथे महावितरण कार्यालयांतर्गत काम करणाऱ्या एका वरिष्ठ कंत्राटी कामगाराचा विजेचा तीव्र धक्का लागून दुर्दैवी मृत्यू झाल्याची घटना घडली आहे. शुक्रवारी (ता. 29) सायंकाळी चार वाजून दहा वाजण्याच्या सुमारास ही घटना घडली.
अशोक किसन जवळकर (वय -52, रा. आळंदी म्हातोबाची, ता. हवेली, जि. पुणे) असे विजेचा धक्का लागून मृत्युमुखी पडलेल्या दुर्दैवी कंत्राटी कर्मचाऱ्याचे नाव आहे. या घटनेमुळे आळंदी म्हातोबाची आणि कुंजीरवाडी परिसरात प्रचंड हळहळ आणि महावितरणच्या कारभाराविषयी तीव्र नाराजी व्यक्त केली जात आहे.
मिळालेल्या माहितीनुसार, अशोक जवळकर हे गेल्या 18 ते 19 वर्षांपासून थेऊर व परिसरात महावितरणची विजेची कामे करत होते. शुक्रवारी सायंकाळी सव्वाचार वाजेच्या सुमारास थेऊर परिसरातील एका ट्रान्सफॉर्मरवर दुरुस्तीचे काम सुरू होते. काम सुरू करण्यापूर्वी नियमानुसार ‘परमिट’ (वीज प्रवाह बंद करण्याचे अधिकृत पत्र) घेण्यात आले असल्याची माहिती समोर येत आहे. मात्र, डीपीवर चढून काम करत असताना अचानक मुख्य लाईनमध्ये विजेचा उच्च दाबाचा प्रवाह उतरला आणि जवळकर यांना विजेचा जोरदार धक्का बसला.
विजेचा तीव्र धक्का बसल्याने अशोक जवळकर हे थेट डीपीवरून खाली जमिनीवर कोसळले. त्यांना गंभीर अवस्थेत स्थानिक नागरिकांच्या व सहकाऱ्यांच्या मदतीने तातडीने लोणी काळभोर येथील एका खासगी रुग्णालयात उपचारासाठी दाखल करण्यात आले. मात्र, त्यांची प्राणज्योत मालवली होती; डॉक्टरांनी उपचारादरम्यान त्यांना मृत घोषित केले. परमिट घेतलेले असताना डीपीवर अचानक वीज प्रवाह सुरू कसा झाला? महावितरणच्या निष्काळजीपणामुळेच एका निष्पाप कर्मचाऱ्याचा नाहक बळी गेला का? असे गंभीर सवाल आता उपस्थित केले जात आहेत.
दरम्यान, 18 वर्षे सेवा देऊनही सुरक्षा साधनांचा अभाव आणि तंत्रज्ञांच्या निष्काळजीपणामुळे हा अपघात घडल्याचा आरोप स्थानिकांकडून केला जात आहे. या प्रकरणी संबंधित दोषी अधिकाऱ्यांवर व कर्मचाऱ्यांवर तात्काळ गुन्हे दाखल करून, मृत जवळकर यांच्या कुटुंबाला योग्य आर्थिक मदत देण्यात यावी, अशी जोरदार मागणी आळंदी म्हातोबाची व थेऊर परिसरातील ग्रामस्थांनी केली आहे.
