पुणे : १३५ कोटी रुपयांच्या कथित बँक फसवणूक प्रकरणात अंमलबजावणी संचालनालयाने (ED) मोठी कारवाई केली आहे. गजानन गंगामाई इंडस्ट्रीज एलएलपी आणि इतर संबंधितांविरोधात मनी लाँडरिंग प्रतिबंधक कायद्याअंतर्गत (PMLA) ही कारवाई करण्यात आली. मुंबई आणि छत्रपती संभाजीनगरमधील सहा ठिकाणी ईडीने छापे टाकले. कर्जाच्या रकमेत गैरव्यवहार करून ती शेल कंपन्यांच्या माध्यमातून वळवण्यात आल्याचा दावा ईडीने केला आहे.
ईडीच्या कारवाईदरम्यान सिंगापूरमधील इंडियन बँकेच्या खात्यात असलेली ३.७ मिलियन डॉलर म्हणजेच सुमारे ३५.७१ कोटी रुपयांची मुदत ठेव (FD) गोठवण्यात आली आहे. याशिवाय BMW 320 LD ग्रँड लक्झरी लाईन कार, डिजिटल उपकरणे आणि महत्त्वाची कागदपत्रे जप्त करण्यात आल्याची माहिती आहे.
दरम्यान, अमेरिकन नागरिकांची फसवणूक करणाऱ्या कथित बनावट कॉल सेंटरच्या नेटवर्कवरही ईडीने कारवाई केली आहे. अंमलबजावणी संचालनालय आणि अमेरिकन सिक्रेट सर्व्हिस यांच्या संयुक्त कारवाईत चंदीगड, हैदराबाद आणि पुणे परिसरातील बनावट कॉल सेंटरचा तपास करण्यात आला. पटियाला, पुणे आणि चंदीगडमध्ये एकूण चार ठिकाणी छापेमारी करण्यात आल्याचे सांगण्यात आले आहे.
या कारवाईत चंदीगडमधील पटियाला परिसरात दोन आणि पुण्यात एक अशी तीन सुरू असलेली बनावट कॉल सेंटर आढळून आल्याचा दावा करण्यात आला आहे. ईडीच्या छाप्यावेळी या ठिकाणी सुमारे २२० जण काम करताना आढळले. अमेरिकन नागरिकांना वेगवेगळी खोटी कारणे सांगून फोन करण्यात येत होते आणि त्यांच्याकडून पैसे उकळले जात असल्याचा तपास ईडीकडून सुरू आहे.
चंदीगडमधील एका घरातून पटियाला येथील कॉल सेंटरचे नियंत्रण आणि समन्वय केला जात असल्याचे तपासात समोर आल्याचे ईडीने म्हटले आहे. या कारवाईदरम्यान ६६ मोबाईल फोन, १३ लॅपटॉप, हार्ड डिस्क, कम्युनिकेशन उपकरणे, रोकड आणि विविध कागदपत्रे जप्त करण्यात आली आहेत.
डॉलरमध्ये मिळणारी कथित फसवणुकीची रक्कम भारतीय रुपयांमध्ये रूपांतरित करण्यासाठी काही व्यक्ती कार्यरत असल्याचा ईडीला संशय आहे. या अनुषंगाने कॉलिंग स्क्रिप्ट, डायलर, व्हीओआयपी प्रणाली तसेच पैशांच्या व्यवहारांची तपासणी सुरू आहे. या संपूर्ण कारवाईमुळे कथित सायबर फसवणूक आणि बनावट कॉल सेंटरच्या नेटवर्कचा तपास आणखी व्यापक होण्याची शक्यता आहे.
