पुणे : दहावी आणि बारावीच्या परीक्षेची तयारी करणाऱ्या विद्यार्थ्यांसह पालकांसाठी महत्त्वाची बातमी आहे. महाराष्ट्र राज्य माध्यमिक व उच्च माध्यमिक शिक्षण मंडळाने फेब्रुवारी-मार्च २०२७ मध्ये होणाऱ्या दहावी आणि बारावीच्या परीक्षांचे संभाव्य वेळापत्रक जाहीर केले आहे. त्यानुसार बारावीच्या लेखी परीक्षा ८ फेब्रुवारी ते १६ मार्च २०२७ या कालावधीत, तर दहावीच्या लेखी परीक्षा १५ फेब्रुवारी ते ११ मार्च २०२७ या कालावधीत होणार आहेत.
महाराष्ट्र राज्य माध्यमिक व उच्च माध्यमिक शिक्षण मंडळाच्या पुणे, नागपूर, छत्रपती संभाजीनगर, मुंबई, कोल्हापूर, अमरावती, नाशिक, लातूर आणि कोकण या नऊ विभागीय मंडळांमार्फत या परीक्षा घेण्यात येणार आहेत. विद्यार्थ्यांना अभ्यासाचे नियोजन करता यावे आणि परीक्षेचा ताण कमी व्हावा, या उद्देशाने मंडळाने प्रात्यक्षिक तसेच लेखी परीक्षांच्या संभाव्य तारखा जाहीर केल्या आहेत.
बारावीच्या उच्च माध्यमिक प्रमाणपत्र (HSC) परीक्षेच्या लेखी पेपरला सोमवार, ८ फेब्रुवारी २०२७ पासून सुरुवात होणार असून मंगळवार, १६ मार्च २०२७ रोजी लेखी परीक्षा संपणार आहे. बारावीच्या प्रात्यक्षिक, श्रेणी, तोंडी आणि अंतर्गत मूल्यमापनाच्या परीक्षा बुधवार, २० जानेवारी ते शनिवार, ६ फेब्रुवारी २०२७ या कालावधीत घेण्यात येणार आहेत.
दहावीच्या माध्यमिक शालांत प्रमाणपत्र (SSC) परीक्षेची लेखी परीक्षा सोमवार, १५ फेब्रुवारी २०२७ पासून सुरू होईल. गुरुवार, ११ मार्च २०२७ रोजी दहावीची लेखी परीक्षा संपणार आहे. दहावीच्या प्रात्यक्षिक, श्रेणी, तोंडी आणि अंतर्गत मूल्यमापनाच्या परीक्षा गुरुवार, २८ जानेवारी ते शनिवार, १३ फेब्रुवारी २०२७ या कालावधीत घेण्यात येतील.
दरम्यान, सध्या जाहीर करण्यात आलेल्या तारखा संभाव्य असून विषयानुसार परीक्षेचे सविस्तर वेळापत्रक स्वतंत्रपणे जाहीर केले जाणार आहे. प्रात्यक्षिक, श्रेणी, तोंडी, अंतर्गत मूल्यमापन आणि लेखी परीक्षांचे विषयानिहाय वेळापत्रक मंडळाच्या संकेतस्थळावर प्रसिद्ध करण्यात येणार आहे. त्यामुळे विद्यार्थ्यांनी सविस्तर वेळापत्रक जाहीर झाल्यानंतर त्यानुसार अभ्यासाचे नियोजन करावे.
