न्हावरे: तोंडाच्या कर्करोगामुळे होत असलेल्या त्रासाला कंटाळून वडगाव रासाई (ता.शिरूर) येथील एका व्यक्तीने घरावर तसेच स्वतःच्या अंगावर पेट्रोल ओतून पेटवून घेत आत्महत्या केल्याची दुर्दैवी घटना घडली आहे.या घटनेत जिगनू सुरुकुल पवार यांचा मृत्यू झाला.
याबाबत शिरूर पोलीस ठाण्यात अकस्मात मृत्यूची नोंद करण्यात आली आहे.याप्रकरणी मृताची पत्नी सीमा जुगनू पवार (वय ४५, रा.वडगाव रासाई,ता.शिरूर, जि.पुणे) यांनी शिरूर पोलिस ठाण्यामध्ये फिर्याद दाखल केली आहे.
पोलिसांनी दिलेल्या माहितीनुसार, शनिवारी (ता ८) दुपारी दोन वाजण्याच्या सुमारास सीमा पवार व त्यांचे पती जिगनू पवार हे वडगाव रासाई येथील मारुती मंदिरात झोपले होते. त्यावेळी जिगनू यांच्या हातात पेट्रोलची बाटली असल्याचे पत्नीच्या निदर्शनास आले. यावेळी सीमा पवार यांनी पेट्रोल कशासाठी आणले, अशी विचारणा जिगनू यांना केली असता, जिगनू यांनी काही नाही,असे सांगितले. त्यानंतर त्यांनी पेट्रोलची बाटली लपवून ठेवली.
दरम्यान ,जिगनू यांनी आपल्याला तोंडामध्ये मोठ्या प्रमाणात त्रास होत असून,जगण्याची इच्छाच राहिली नसल्याचे पत्नीला सांगितल्याचे तक्रारीत नमूद करण्यात आले आहे. त्यानंतर जिगनूने भूक लागल्याचे सांगून पत्नीला जेवण आणण्यास सांगितले. त्यामुळे सीमा पवार जेवण आणण्यासाठी गेल्या असता, सायंकाळी पाच वाजण्याच्या सुमारास त्या घरी परतल्या असता घराला आग लागल्याचे त्यांच्या निदर्शनास आले. त्यांनी घटनास्थळी धाव घेतली असता जिगनू पवार हे आगीत जळून मृत झाल्याचे आढळून आले.
जिगनू पवार यांनी तोंडाच्या कर्करोगामुळे होत असलेल्या त्रासातून पेट्रोल ओतून स्वतःला पेटवून घेत आत्महत्या केल्याचे त्यांच्या पत्नी सीमा पवार यांनी पोलिसांना दिलेल्या माहितीत म्हटले आहे. या घटनेची नोंद शिरूर पोलीस ठाणे अकस्मात मृत्यू अशी करण्यात आली असून,पुढील तपास शिरूर पोलीस करीत आहेत.
