उरुळी कांचन, (पुणे) : उरुळी कांचन, (पुणे) येथील सनमित्र बँकेसमोर दुचाकीच्या हँडलला लावलेली 1 लाख रुपयांची रोख रक्कम अन् कुटुंबातील सर्व सदस्यांची महत्त्वाची बँक कागदपत्रे असलेली पिशवी अज्ञात चोरट्याने चोरून नेली. याप्रकरणी उरुळी कांचन पोलीस ठाण्यात अज्ञात इसमाविरुद्ध चोरीचा गुन्हा दाखल करण्यात आला आहे. ही घटना बुधवारी (ता. 19) दुपारी 12.30 वा ते 01.20 वाचे सुमारास उरुळी कांचन गावचे हद्दीतील सनमित्र बैंक समोर घडली.
याबाबत नाना बाबूराव गायकवाड (वय 60, व्यवसाय-शेती, रा. बोरीऐंदी, ता. दौंड, जि. पुणे) यांनी याप्रकरणी उरुळी कांचन पोलीस ठाण्यात फिर्याद दिली आहे. त्यानुसार पोलिसांनी अज्ञात चोरट्याच्या विरोधात गुन्हा दाखल केला आहे.
पोलिसांनी दिलेल्या माहितीनुसार, बुधवारी दुपारच्या सुमारास नाना गायकवाड हे आपल्या दुचाकीवरून उरुळी कांचन येथील सनमित्र बँकेसमोर आले होते. त्यांनी आपली दुचाकी बँकेसमोर पार्क केली होती. त्यांच्या दुचाकीच्या डाव्या बाजूच्या हँडलला एक राखाडी रंगाची पिशवी अडकवलेली होती. या पिशवीत 1लाख रुपयांची रोख रक्कम तसेच कुटुंबातील सदस्यांचे महत्त्वाचे दस्तऐवज होते. गायकवाड काही कामानिमित्त बाजूला गेले असता, संधी साधून अज्ञात चोरट्याने हँडलवरील पिशवी चोरून पळ काढला.
चोरट्याने लांबवलेल्या पिशवीत 1 लाखांच्या रोख रकमेसोबतच सर्व कुटुंबियांच्या मुदत ठेव (FD) पावत्या, चेकबुक, आर.डी. (RD) व एस.बी. (SB) खात्यांची पुस्तके, मुलगा व पत्नी यांच्या एलआयसी पावत्या, बँक ऑफ इंडियाची कागदपत्रे, स्टेट बँक उरुळी कांचन शाखेतील पेन्शन अकाउंटचे पासबुक व चेकबुक, आई पारूबाई यांच्या नावाचे चेकबुक व पासबुक आणि पती-पत्नीच्या संयुक्त खात्याचे पासबुक व चेकबुक होते.
दरम्यान, कामावरून परत आल्यानंतर दुचाकीवरील पिशवी गायब असल्याचे दिसताच नाना गायकवाड यांनी परिसरात शोध घेऊनही पिशवी सापडली नाही. अखेर त्यांनी तात्काळ पोलीस ठाणे गाठून फिर्याद नोंदवली. याप्रकरणी उरुळी कांचन पोलिसांत अज्ञात चोरट्याविरोधात गुन्हा दाखल करण्यात आला असून पुढील तपास सहाय्यक फौजदार रमेश भोसले करत आहेत.
