पुणे: पुण्यात पोलीस उपनिरीक्षक पदावर कार्यरत असलेल्या व्यक्तीविरोधात पत्नीने गंभीर आरोप करत पोलिसांत तक्रार दाखल केली आहे. पती आणि सासूने गेल्या काही वर्षांपासून मानसिक व शारीरिक त्रास दिल्याचा दावा महिलेने केला आहे. गर्भवती असतानाही मारहाण केल्याचा, तसेच बेकायदेशीर गर्भलिंग तपासणी करून गर्भपात करण्यास भाग पाडल्याचा आरोप तिने केला आहे. या प्रकरणी पती धनाजी रंगराव टोणे आणि त्याची आई अनसूया रंगराव टोणे यांच्याविरोधात गुन्हा दाखल करण्यात आला आहे.
महिलेच्या तक्रारीनुसार, मे 2019 मध्ये तिचे लग्न झाले. लग्नानंतर काही काळातच पतीकडून नोकरी करण्यासाठी दबाव टाकला जात असल्याचे तिने सांगितले. “तू नोकरी कर, माझ्या जिवावर बसून खाऊ नको, तुला तुळशीसारखी सडवीन” अशी धमकी दिली. तिच्यावर मानसिक आणि शारीरिक अत्याचार सुरू झाल्याचा आरोपही करण्यात आला आहे. 2020 मध्ये ती 7 महिन्यांची गर्भवती असताना पतीने तिला मारहाण केल्याचे तक्रारीत नमूद आहे.
तसेच, पत्नीला मुलगा होत नसल्याचे सांगून तिच्यावर मारहाण करण्यात आल्याचा आरोप आहे. गळा दाबून जीवे मारण्याचा प्रयत्न केल्याचेही महिलेने पोलिसांना सांगितले. याप्रकरणी पोलिसांनी पतीविरोधात गंभीर कलमांनुसार कारवाई सुरू केली आहे.
मे 2025 मध्ये पतीने आईच्या मदतीने गर्भलिंग तपासणी केल्याचा आरोप महिलेने केला आहे. गर्भात मुलगी असल्याचे समजल्यानंतर तिच्यावर गर्भपातासाठी दबाव टाकण्यात आला. त्यानंतर तिचा जबरदस्तीने गर्भपात करण्यात आल्याचा दावा तिने तक्रारीत केला आहे.
यापूर्वी महिलेने पतीविरोधात वरिष्ठ पोलीस अधिकाऱ्यांकडे तक्रार केल्याचेही समोर आले आहे. आरोपी धनाजी टोणे हा मांजरी पोलीस ठाण्यात PSI म्हणून कार्यरत असल्याची माहिती आहे. गुन्हा दाखल झाल्यानंतर तो सुट्टीवर गेल्याचे सांगण्यात येत असून, पुढील तपास पोलीस निरीक्षक इरफान नदाफ करत आहेत.
