आदित्य बोराटे
इंदापूर: दरोडा टाकण्याच्या तयारीत असलेल्या पाच जणांचा डाव इंदापूर पोलिसांनी उधळून लावला. पोलिसांनी पाठलाग करून होंडा सिटी कारची तपासणी केली असता त्यामध्ये तलवार, कटावणी व पक्कड आढळून आली. याप्रकरणी गोविंद संजू काळे (रा. सवतगव्हाण, ता. माळशिरस, जि. सोलापूर) याला पोलिसांनी ताब्यात घेतले असून, त्याच्यासह चार जणांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, बुधवार (ता. २०) रात्री १.२० ते १.४५च्या सुमारास पोलिस रात्रगस्तीवर होते. त्यावेळी वालचंदनगर पोलिस ठाण्यातील अंमलदारांकडून होंडा सिटी कार (एमएच १४ एएम ९११९) बाबत माहिती मिळाली. त्यानुसार पोलिसांनी पिंपरी बुद्रुक ते निरा नरसिंहपूरमार्गे संगम पुलाच्या पुढील भागापर्यंत या कारचा पाठलाग केला.
वाहनाची खात्री करून तपासणी केली असता त्यामध्ये तलवार, कटावणी आणि पक्कड आढळून आली. दरोडा टाकण्याच्या तयारीत असल्याच्या संशयावरून पोलिसांनी गोविंद काळे याला जागीच ताब्यात घेतले. त्याच्याकडे चौकशी केली असता त्याने सोबत असलेल्या सुभाष राजू चव्हाण, कुणाल परशुराम काळे, कालू शंकर पवार आणि राहुल रमेश चव्हाण (सर्व रा. सवतगव्हाण, ता. माळशिरस, जि. सोलापूर) यांची नावे सांगितल्याचे फिर्यादीत नमूद आहे.
या प्रकरणी पोलिस हवालदार महेश दत्तात्रय गोसावी यांनी दिलेल्या फिर्यादीवरून इंदापूर पोलिस ठाण्यात गुन्हा क्रमांक ५१२/२०२६ दाखल करण्यात आला आहे. भारतीय न्याय संहिता (BNS) कलम ३१०(४) तसेच आर्म्स ॲक्ट कलम ४ व २५ अन्वये गुन्हा दाखल करण्यात आला आहे.
इंदापूर पोलीस ठाण्याचे पोलिस निरीक्षक विलास नाळे यांच्या मार्गदर्शनाखाली गुन्हा दाखल करण्याची कार्यवाही पोलिस हवालदार यादव यांनी केली.पुढील तपास सहाय्यक पोलिस निरीक्षक चेके तपास करीत आहेत.
