नाशिक : नाशिक जिल्ह्यातील वाडीवऱ्हे परिसरातील एका रिसॉर्टबाहेर घडलेल्या तरुणीच्या संशयास्पद मृत्यू प्रकरणाचा उलगडा करण्यात पोलिसांना यश आले आहे. सुरुवातीला अपघात वाटणारी ही घटना प्रत्यक्षात प्रेमसंबंधातील वादातून झालेला खून असल्याचे स्पष्ट झाले आहे. या प्रकरणी अंबड येथील संशयित आरोपी प्रियकर दीपक शिवाजी सैंदाणे (वय 43) याला पोलिसांनी बेड्या ठोकल्या आहेत.
समोर आलेल्या माहितीनुसार, अंबड परिसरातील एकदंतनगर येथे राहणाऱ्या रूपाली नीलेश पाटील (वय 34) या सिडकोतील एका डायग्नोस्टिक सेंटरमध्ये कार्यरत होत्या. व्यावसायिक कामानिमित्त त्या दीपक सैंदाणेसोबत कारने वाडीवऱ्हे परिसरात गेल्या होत्या. सांजेगाव येथील ‘मिरची’ हॉटेल-रिसॉर्टमध्ये जेवणासाठी जाण्यापूर्वी दीपकने गाडीतच मद्यप्राशन केले होते.
रिसॉर्टमध्ये पोहोचल्यावर दोघांमध्ये तीव्र शाब्दिक चकमक झाली. या वादाचे रूपांतर नंतर हाणामारीत झाले. त्यामुळे अत्यंत संतप्त झालेल्या रूपाली कारमधून बाहेर पडून रिसॉर्टच्या मुख्य दरवाजाच्या दिशेने चालू लागल्या.संतापाच्या भरात दीपकने भरधाव वेगात कार चालवून रूपाली यांना मागून जोरदार धडक दिली. या भीषण धडकेत कारखाली चिरडल्या गेल्यामुळे रूपाली यांचा जागीच मृत्यू झाला.
घटनेनंतर दीपकने कारवरील ताबा सुटल्यामुळे अपघात झाल्याचा बनाव रचण्याचा प्रयत्न केला. मात्र, घटनास्थळाची पाहणी केल्यानंतर पोलिसांचा संशय बळावला. त्यांनी दीपकला ताब्यात घेऊन खाक्या दाखवताच त्याने स्वतःच्या गुन्ह्याची कबुली दिली. मागील 2 वर्षांपासून त्यांच्यात प्रेमसंबंध असल्याचेही तपासात समोर आले आहे.
मृत रूपाली यांच्या पश्चात पती, 7 वर्षांची लहान मुलगी आणि सासू-सासरे असा परिवार आहे. या धक्कादायक घटनेमुळे सिडको आणि अंबड भागात मोठी खळबळ उडाली आहे. वाडीवऱ्हे पोलीस ठाण्यात खुनाचा गुन्हा नोंदवण्यात आला असून पोलीस पुढील कायदेशीर कारवाई करत आहेत.
