उरुळी कांचन, (पुणे) : उच्च न्यायालयाने जामीन मंजूर करताना लावलेल्या अटींचे उल्लंघन करून बेकायदेशीरपणे वावरणाऱ्या एका अट्टल गुन्हेगाराला स्थानिक गुन्हे ग्रामीण शाखेच्या पथकाने रंगेहाथ पकडले. शनिवारी (ता. 20) संध्याकाळी सव्वा नऊ वाजण्याच्या सुमारास ही कारवाई करण्यात आली.
आकाश मंजाबापू राखपसरे (वय 26, रा. काळेशिवार शिंदवणे, ता. हवेली, जि. पुणे) असे उच्च न्यायालयाच्या आदेशाची अवहेलना करणाऱ्या आरोपीचे नाव आहे. याप्रकरणी स्थानिक गुन्हे शाखेचे पोलीस हवालदार गुरुनाथ युवराज गायकवाड यांनी उरुळी कांचन पोलीस ठाण्यात सरकारतर्फे फिर्याद दिली आहे.
पोलिसांनी दिलेल्या माहितीनुसार, आरोपी आकाश राखपसरे अट्टल गुन्हेगार असून त्याच्यावर विविध गुन्हे दाखल आहे. राखपसरे याला मुंबई उच्च न्यायालयाने जामीन मंजूर केला होता. जामीन मंजूर करताना उच्च न्यायालयाने अट घातली होती की, “जोपर्यंत संबंधित खटला पूर्ण संपत नाही तोपर्यंत आरोपीने पुणे जिल्ह्यातील हवेली तालुक्याच्या हद्दीत अजिबात प्रवेश करायचा नाही.”
शनिवारी (ता. 20) स्थानिक गुन्हे शाखेचे पथक पुणे-सोलापूर हायवेवर गुन्हे प्रतिबंधक पेट्रोलिंग करत होते. यावेळी सहाय्यक फौजदार सचिन घाडगे यांना बातमीदारामार्फत बातमी मिळाली की, आरोपी आकाश राखपसरे हा उरुळी कांचन गावच्या हद्दीत पांढरस्थळ येथील आपल्या राहत्या घराजवळ केनॉलवर उघडपणे फिरत आहे.
दरम्यान, या माहितीनंतर स्थानिक गुन्हे शाखेच्या पथकाने उरुळी कांचन पोलीस ठाण्यातील पोलिसांना माहिती दिली. दहा वाजण्याच्या सुमारास पोलिसांनी पांढरस्थळ केनॉल परिसरातून आकाश राखपसरे याला पोलिसांनी ताब्यात घेतले. न्यायालयाच्या कायदेशीर आदेशाची अवहेलना आणि अवज्ञा केल्याप्रकरणी आरोपी आकाश राखपसरे याच्याविरुद्ध उरुळी कांचन पोलीस ठाण्यात गुन्हा दाखल करून अटक करण्यात आली आहे.
सदरची कामगिरी स्थानिक गुन्हे शाखेचे सहाय्यक फौजदार सचिन घाडगे, पोलीस हवालदार गुरुनाथ गायकवाड, सुभाष राऊत, योगेश नागरगोजे आणि विकास कापरे यांच्या पथकाने केली आहे. या गुन्ह्याचा पुढील तपास उरुळी कांचन पोलीस ठाण्याचे पोलीस हवालदार जगताप हे करत आहेत.
