शिरूर: शिरूर पोलिसांनी सराईत दुचाकी चोराला अटक करून मोटारसायकल चोरीचे सहा गुन्हे उघडकीस आणले आहेत. कृष्णा उमेश आंतरकर(वय २६, रा. पाथर्डी, जि. अहिल्यानगर)असे अटक करण्यात आलेल्या आरोपीचे नाव आहे.
५ ऑगस्ट रोजी बी.जे.कॉर्नर परिसरातून चोरीस गेलेल्या स्प्लेंडर मोटारसायकल प्रकरणाचा तपास करताना पोलिसांनी तांत्रिक विश्लेषण, सीसीटीव्ही फुटेज व गोपनीय माहितीच्या आधारे आरोपीला ताब्यात घेतले. चौकशीदरम्यान त्याने शिरूर पोलिस ठाण्याच्या हद्दीतील आणखी पाच दुचाकी चोरीचे गुन्हे केल्याची कबुली दिली. त्यामुळे एकूण सहा गुन्हे उघडकीस आले आहेत.
आरोपीवर यापूर्वीही बीड जिल्ह्यात मोटारसायकल चोरीचे चार गुन्हे दाखल असून, न्यायालयाने त्याला पोलिस कोठडी सुनावली आहे. ही कारवाई पोलिस निरीक्षक विनोद पाटील यांच्या मार्गदर्शनाखाली डी.बी. पथकाचे पोलिस उपनिरीक्षक शुभम चव्हाण व त्यांच्या सहकाऱ्यांनी केली.
