लोणी काळभोर : महाराष्ट्र शासनाने प्रतिबंधित केलेला गुटखा, पानमसाला आणि सुगंधित तंबाखूजन्य पदार्थांचा अवैध साठा करून विक्री करणाऱ्या टोळीवर मांजरी (ता. हवेली) परिसरात अंमली पदार्थ विरोधी पथकाने कारवाई केली. या कारवाईत दोघांना अटक करण्यात आली असून, गुटख्याचा पुरवठा करणारा संशयित फरार झाला आहे. पोलिसांनी गुटखा, पानमसाला, तंबाखूजन्य पदार्थ, इलेक्ट्रिक दुचाकी आणि मोबाईल असा एकूण 3 लाख 11 हजार 41 रुपयांचा मुद्देमाल जप्त केला.
राजरत्न धुराप्पा गवळी (वय 21, रा. मांजरी बु.) आणि भगवान शिवराम गवळी (वय 27, रा. मांजरी बु.) अशी अटक करण्यात आलेल्या आरोपींची नावे आहेत. तर जगदिश सोलंकी (रा. वाघोली) हा संशयित फरार असल्याचे पोलिसांनी सांगितले. पोलिसांनी दिलेल्या माहितीनुसार, मांजरी परिसरात प्रतिबंधित गुटखा व तंबाखूजन्य पदार्थांचा साठा करून त्याची विक्री केली जात असल्याची माहिती अंमली पदार्थ विरोधी पथकाला मिळाली होती. त्यानुसार 30 सप्टेंबर रोजी मांजरी बुद्रुक येथील सम्राट पान शॉपच्या पाठीमागे, माळवाडी परिसरात अन्न सुरक्षा अधिकारी दिपाली घोडके यांच्या उपस्थितीत पंचांसमक्ष कारवाई करण्यात आली.
अंमली पदार्थ विरोधी पथक-2, गुन्हे शाखेचे प्रभारी अधिकारी जीवन माने यांच्या मार्गदर्शनाखाली सहायक पोलीस निरीक्षक अफरोज पठाण व त्यांच्या पथकाने राजरत्न गवळी याला ताब्यात घेतले. त्याच्या ताब्यातील पांढऱ्या रंगाच्या पोत्यांची झडती घेतली असता विविध कंपन्यांचा पानमसाला, गुटखा आणि तंबाखूजन्य पदार्थ मोठ्या प्रमाणात आढळून आला. या मुद्देमालाची किंमत 97 हजार 350 रुपये असल्याचे पोलिसांनी सांगितले. त्याच्याकडून सुमारे 70 हजार रुपयांची इलेक्ट्रिक मोटारसायकल आणि 25 हजार रुपयांचा मोबाईल फोन देखील जप्त करण्यात आला.
चौकशीत राजरत्न गवळी याने हा प्रतिबंधित माल वाघोली येथील जगदिश सोलंकी याच्याकडून विक्रीसाठी खरेदी केल्याची माहिती दिल्याचे फिर्यादीत नमूद आहे. सोलंकी याचे वाघोली येथे गोडाऊन असून, तेथून किरकोळ विक्रेत्यांना प्रतिबंधित माल पुरविला जात असल्याचेही त्याने सांगितल्याचे तक्रारीत नमूद आहे.
यानंतर पोलिसांचे पथक राजरत्न गवळी याला सोबत घेऊन वाघोलीतील काळे कॉम्प्लेक्स, वाघमारे वस्ती परिसरात पोहोचले. तेथील एका गाळ्यात प्रतिबंधित पानमसाला, तंबाखू आणि गुटख्याचा साठा आढळून आला. पोलिसांचे पथक गाळ्याकडे जात असताना एक संशयित व्यक्ती जिन्यावरून घाईघाईने खाली येताना दिसली. पोलिसांनी त्याचा पाठलाग करून पकडण्याचा प्रयत्न केला; मात्र तो पळून जाण्यात यशस्वी झाला. राजरत्न गवळी याने तो व्यक्ती जगदिश सोलंकी असल्याचे सांगितल्याचे पोलिसांच्या तक्रारीत नमूद आहे.
पोलिसांनी गाळ्याची झडती घेतली असता तेथून विविध प्रकारचा पानमसाला व तंबाखूजन्य पदार्थ असा 73 हजार 691 रुपयांचा मुद्देमाल जप्त करण्यात आला. सदर गाळा जगदिश सोलंकी याने माल साठवण्यासाठी भाड्याने घेतल्याची माहिती गाळामालकाने पोलिसांना दिल्याचे फिर्यादीत नमूद आहे. दरम्यान, राजरत्न गवळीचा साथीदार भगवान शिवराम गवळी यालाही पोलिसांनी ताब्यात घेतले. त्याच्याकडून 40 हजार रुपयांचा सॅमसंग कंपनीचा मोबाईल फोन जप्त करण्यात आला. अशाप्रकारे मांजरी आणि वाघोली परिसरातील कारवाईत प्रतिबंधित गुटखा, पानमसाला व तंबाखूजन्य पदार्थांसह इलेक्ट्रिक दुचाकी व मोबाईल असा एकूण 3 लाख 11 हजार 41 रुपयांचा मुद्देमाल पोलिसांनी जप्त केला.
याप्रकरणी अन्न सुरक्षा अधिकारी दिपाली भाऊसाहेब घोडके यांनी मांजरी पोलीस ठाण्यात राजरत्न धुराप्पा गवळी, भगवान शिवराम गवळी आणि आरोपी जगदिश सोलंकी यांच्याविरुद्ध भारतीय न्याय संहितेतील संबंधित कलमे, सिगारेट व अन्य तंबाखूजन्य उत्पादने कायदा तसेच अन्न सुरक्षा व मानके अधिनियमांतर्गत तक्रार दाखल केली आहे. मांजरी पोलीस ठाण्याचे पोलीस उपनिरीक्षक बालाजी डिगोळे पुढील तपास करीत आहेत.
