उरुळी कांचन : अवैध गावठी हातभट्टीची दारू निर्मिती आणि विक्रीसाठी ओळखल्या जाणाऱ्या वस्त्यांमध्ये आता रोजगाराच्या नव्या संधी निर्माण करण्यासाठी उरुळी कांचन पोलिसांनी पुढाकार घेतला आहे. वारंवार कारवाई करून हातभट्टीची दारू विक्री बंद केल्यानंतर संबंधित कुटुंबांना रोजगाराच्या मुख्य प्रवाहात आणण्यासाठी पोलिसांनी ‘मिशन परिवर्तन’ संस्थेच्या सहकार्याने जनजागृती सुरू केली आहे.
शनिवारी (ता. 03) उरुळी कांचन येथील पांढरस्थळ, शिंदवणे हद्दीतील काळे शिवार आणि भवरापूर येथील कंजारभट वस्त्यांना वरिष्ठ पोलीस निरीक्षक विजयमाला पवार यांनी पोलीस पथकासह भेट दिली. यावेळी मिशन परिवर्तन संस्थेचे पदाधिकारीही उपस्थित होते. यापूर्वी या वस्त्यांमध्ये अवैध गावठी हातभट्टीची दारू तयार करून विक्री केली जात होती. पोलिसांनी सातत्याने छापे टाकून आणि गुन्हे दाखल करून ही अवैध दारू विक्री व निर्मिती बंद केल्याचे पोलिसांनी सांगितले. यावेळी पोलीस हवालदार उद्धव गायकवाड, प्रशांत पवार, सोमनाथ चितारे उपस्थित होते.
सध्या संबंधित कुटुंबे मजुरीची कामे करीत असून, त्यांना रोजगाराच्या नव्या संधी आणि उपजीविकेची साधने उपलब्ध होण्यासाठी आवश्यक मार्गदर्शन करण्यात आले. या उपक्रमाला वस्त्यांमधील महिला आणि मुलांनी सकारात्मक प्रतिसाद दिला. यापुढे रोजगार करू; मात्र दारू विक्री करणार नाही, अशी ग्वाहीही त्यांनी पोलिसांना दिली. केवळ कारवाई नव्हे, तर अवैध व्यवसायापासून दूर झालेल्या कुटुंबांना शाश्वत रोजगाराच्या दिशेने नेण्याचा प्रयत्न या उपक्रमातून केला जात आहे.
“रोजगार करू, पण आता दारू विकणार नाही”
पोलिसांच्या आणि संस्थेच्या या सकारात्मक पुढाकाराला वस्तीमधील महिला आणि बालकांनी अत्यंत उत्तम आणि संवेदनशील प्रतिसाद दिला. “यापुढे आम्ही कष्टाचा रोजगार करू, पण कोणत्याही परिस्थितीत पुन्हा दारू विक्रीच्या बेकायदेशीर धंद्याकडे वळणार नाही,” अशी ग्वाही या वस्तीतील महिलांनी पोलीस प्रशासनाला दिली.
गुन्हेगारीमुक्तीसाठी पोलिसांचे ‘ऑपरेशन परिवर्तन’ सुरूच राहणार..
अवैध धंदे करणाऱ्यांमध्ये कायमस्वरूपी सुधारणा व्हावी आणि ते समाजाच्या मुख्य प्रवाहात यावेत, यासाठी उरुळी कांचन पोलिसांकडून अशा सर्वतोपरी उपाययोजना केल्या जात आहेत. गुन्हेगारीमुक्तीसाठी पोलिसांचे ‘ऑपरेशन परिवर्तन’ सुरूच राहणार असल्याचे पोलीस निरीक्षक विजयमाला पवार यांनी सांगितले. तसेच पोलिसांच्या या कारवाईसोबतच पुनर्वसनाच्या सामाजिक उपक्रमाचे संपूर्ण हवेली परिसरातून कौतुक केले जात आहे
