लोणी कंद, ता. 19 : गणेशोत्सवाच्या पार्श्वभूमीवर गुन्हे प्रतिबंधात्मक कारवाईसाठी पेट्रोलिंग करत असलेल्या लोणीकंद पोलिसांनी पेरणे येथे तलवार आणि कोयत्यांसारखी घातक शस्त्रे बाळगणाऱ्या चौघांना ताब्यात घेतले. त्यांच्या ताब्यातून एक लोखंडी तलवार, तीन लोखंडी कोयते, एक मोठा कोयता आणि दोन दुचाकी असा तब्बल 1 लाख 4 हजार 600 रुपयांचा मुद्देमाल जप्त करण्यात आला आहे. गुरुवारी (ता. 17) पेरणे फाटा परिसरातील शिवशंभु पार्क प्लॉटिंग येथे ही कारवाई करण्यात आली.
धनंजय काशिनाथ आखाडे, (वय 23, रा. माऊलाई चौक, शिवशंभु पार्क प्लॉटिंग, पेरणे, ता. हवेली), सोहम गणेश आढाव, (वय 21), व दोन अल्पवयीन मुले अशी अटक करण्यात आलेल्या आरोपींची नावे आहेत. याबाबत पोलीस शिपाई मल्हारी नरसिंग सपुरे यांनी लोणीकंद पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, लोणीकंद पोलिस ठाण्याच्या तपास पथकाला गुरुवारी दुपारी पेरणे फाटा परिसरात पेट्रोलिंग करत असताना शिवशंभु पार्क प्लॉटिंग येथे काही तरुणांकडे पोत्यात घातक शस्त्रे असल्याची गोपनीय माहिती मिळाली. माहितीची खातरजमा करून पोलिसांनी पंचांसह शिवशंभु पार्क प्लॉटिंग येथे सापळा रचला.
दुपारी दीड वाजण्याच्या सुमारास चार जण दुचाकींसह संशयास्पदरीत्या उभे असल्याचे पोलिसांच्या निदर्शनास आले. पोलिसांनी त्यांना ताब्यात घेऊन पोत्याची झडती घेतली असता त्यामध्ये लोखंडी तलवार आणि विविध प्रकारचे कोयते आढळून आले. पोलिसांनी धनंजय आखाडे, सोहम आढाव दोन अल्पवयीन मुलांना ताब्यात घेतले. कारवाईदरम्यान एकूण सहा घातक शस्त्रे आणि दोन दुचाकी जप्त करण्यात आल्या. यामध्ये दोन्ही बाजूंना धार असलेली 33 इंच लांबीची लोखंडी तलवार, 34.5 इंच लांबीचा एका बाजूस धार असलेला लोखंडी पालघन आणि 15 ते 18 इंच लांबीचे तीन लोखंडी कोयते जप्त केले.
गणेशोत्सवाच्या काळात शस्त्रे बाळगण्यास मनाई असतानाही संबंधितांकडे ही शस्त्रे आढळून आली. पुणे शहर पोलिसांकडून 15 सप्टेंबर ते 28 सप्टेंबर या कालावधीत महाराष्ट्र पोलिस अधिनियमातील संबंधित प्रतिबंधात्मक आदेश लागू करण्यात आले आहेत. या आदेशाचे उल्लंघन केल्याप्रकरणी चौघांविरुद्ध भारतीय हत्यार कायदा कलम 4(25) तसेच महाराष्ट्र पोलिस अधिनियम कलम ३७(१)(२)(३) सह १३५ अन्वये कारवाई करण्यात आली आहे.
ही कारवाई वरिष्ठ पोलिस अधिकाऱ्यांच्या मार्गदर्शनाखाली लोणीकंद पोलिस ठाण्याचे तपास पथकातील सहाय्यक पोलिस निरीक्षक गजानन कागणे, पोलिस हवालदार जाधव, पोलिस नाईक अंदुरे, पोलिस शिपाई शिवले व मरकड यांच्या पथकाने केली.
