उरुळी कांचन, ता. 21 : क्रीडा क्षेत्रात आपल्या यशाची उज्ज्वल परंपरा कायम राखत उरुळी कांचन येथील ‘डॉ. अस्मिता प्राथमिक, माध्यमिक व उच्च माध्यमिक विद्यालयाने’ हवेली तालुकास्तरीय शालेय क्रिकेट स्पर्धेमध्ये ऐतिहासिक कामगिरी करून यशाचा ‘विजयी चौकार’ मारला आहे. तालुक्यातील बलाढ्य शाळांच्या संघांना धूळ चारत अस्मिता विद्यालयाने 14 वर्षांखालील मुले, 17 वर्षांखालील मुले, 17 वर्षांखालील मुली आणि 19 वर्षांखालील मुले अशा चारही मुख्य गटांत अजिंक्यपद मिळवून हवेली तालुक्यात आपला एकछत्री अंमल सिद्ध केला आहे.
श्रीमती सुभद्राबाई रामचंद्र भूमकर जुनिअर कॉलेज (लोणीकंद), क्रीडा व युवक सेवा संचालनालय (महाराष्ट्र राज्य), जिल्हा क्रीडा परिषद व जिल्हा क्रीडा अधिकारी कार्यालय (पुणे) यांच्या संयुक्त विद्यमाने 11 व 12 सप्टेंबर रोजी या स्पर्धेचे भव्य आयोजन करण्यात आले होते. यामध्ये 14 एकूण 29 संघ होते, चुरशीच्या अंतिम सामन्यात डॉ. अस्मिता विद्यालयाने एन. एस. बी. स्कूल (फुलगाव) संघाचा पराभव करत तालुका चषकावर आपले नाव कोरले.
17 वर्षांखालील मुले एकूण 35 संघांनी सहभाग नोंदवला होता. यामध्ये डॉ. अस्मिता विद्यालय (उरुळी कांचन) विरुद्ध धोत्रे स्कूल (फुलगाव) असा अंतिम सामना रंगला. यामध्ये अस्मिता विद्यालयाच्या खेळाडूंनी अंतिम सामना सहज जिंकला. 17 वर्षांखालील मुलींच्या संघाने होली स्पिरिट कॉन्व्हेंट स्कूल (लोणीकंद) संघाचा पराभव करीत अंतिम विजय संपादित केला.
दरम्यान, उच्च माध्यमिक गटात दहा संघानी सहभाग नोंदविला होता. यामध्ये डॉ. अस्मिता जुनिअर कॉलेज (उरुळी कांचन) आणि एम. आय. टी. जुनिअर कॉलेज (लोणी काळभोर) या दोन पारंपरिक प्रतिस्पर्ध्यांमध्ये काँटे की टक्कर पाहायला मिळाली. या अंतिम क्षणापर्यंत रंगलेल्या या थरारक सामन्यात अस्मिता जुनिअर कॉलेजने बाजी मारत यशाचा ‘चौकार’ पूर्ण केला. विद्यार्थ्यांच्या या यशामागे क्रीडा मार्गदर्शक प्रा. शंकरभाऊ वायकर, रोहन सपकाळे सर आणि गीतांजली महाडिक मॅडम यांनी मोलाचे मार्गदर्शन केले. या ऐतिहासिक विजयाबद्दल संस्थेचे संस्थापक अध्यक्ष माननीय महादेव कांचन, सचिव डॉ. अजिंक्य कांचन, संचालक डॉ. आप्पासाहेब जगदाळे, प्राचार्य रोहिणी जगताप, उपप्राचार्य कांचन चव्हाण,व सर्व शिक्षक-शिक्षकेतर कर्मचाऱ्यांनी विजयी खेळाडूंचे अभिनंदन केले.
