पिंपरी-चिंचवड : हिंजवडी आणि माण परिसरातील आयटी कर्मचाऱ्यांसाठी मेट्रो प्रवास अधिक सोयीचा करण्याच्या दृष्टीने महत्त्वाची तयारी सुरू झाली आहे. मेट्रो स्थानकांपासून थेट आयटी कंपन्यांच्या कार्यालयांपर्यंत जाण्यासाठी स्वतंत्र पादचारी पूल उभारण्याचा प्रस्ताव पुढे आला आहे. यामुळे कर्मचाऱ्यांना स्थानकातून कंपनीच्या कार्यालयापर्यंत जाण्यासाठी रस्त्यावरील वाहतुकीचा सामना करावा लागणार नाही.
महाराष्ट्र औद्योगिक विकास महामंडळ (MIDC) आणि पुणे आयटी सिटी मेट्रो रेल लिमिटेड (PITCMRL) यांनी आयटी कंपन्यांशी याबाबत चर्चा सुरू केली आहे. प्रशासनाकडून 5 कंपन्यांना पादचारी पूल उभारणीसंदर्भात प्रस्ताव देण्यात आले होते. त्यापैकी एका कंपनीने या प्रस्तावाला तत्त्वतः मंजुरी दिली असून दोन ठिकाणी पूल उभारण्याची तयारी दर्शवली आहे. उर्वरित 4 कंपन्यांकडून अद्याप प्रतिसादाची प्रतीक्षा आहे.
पादचारी पुलासाठी आवश्यक असलेल्या खांबांची जागा MIDC कडून उपलब्ध करून देण्यात येणार आहे. त्यामुळे जागा निश्चित करण्यास आणि पुढील प्रक्रिया पूर्ण करण्यासाठी काही कालावधी लागण्याची शक्यता आहे. हिंजवडी आयटी पार्कमधील इतर कंपन्यांशीही प्रशासनाकडून चर्चा करण्यात येत आहे.
मुख्य अभियंता रिनाज पठाण यांच्या माहितीनुसार, आणखी कंपन्यांनी सकारात्मक प्रतिसाद दिल्यास त्यांच्या कार्यालयांना मेट्रो स्थानकांशी जोडण्यासाठी आवश्यक नियोजन करता येणार आहे. हिंजवडी-माण ते शिवाजीनगर मेट्रो मार्गाच्या पहिल्या टप्प्यात माण डेपो ते शिवाजीनगर दरम्यान 23 पैकी 17 स्थानकांची कामे पूर्ण झाल्याची माहिती देण्यात आली आहे.
