उरुळी कांचन, (पुणे) : उरुळी कांचन येथील पुणे – सोलापूर महामार्गाशेजारील अमर टायर या दुकानासमोर हँडल लॉक करून पार्क केलेली हिरो स्प्लेंडर प्लस ही दुचाकी अज्ञात चोरट्याने चोरून नेल्याची घटना उघडकीस आली. याप्रकरणी अज्ञात चोरट्यावर उरुळी कांचन पोलीस ठाण्यात गुन्हा दाखल करण्यात आला आहे.
किसन राजाराम टिळेकर (वय-58, रा. टिळेकर मळा, उरुळी कांचन, ता. हवेली) यांनी उरुळी कांचन पोलीस ठाण्यात फिर्याद दिली. त्यानुसार पोलिसांनी अज्ञात चोरट्यावर गुन्हा दाखल करण्यात आला आहे.
पोलिसांनी दिलेल्या माहितीनुसार, तक्रारदार किसन टिळेकर हे शेती व्यवसाय करतात. त्यांनी फेब्रुवारी 2026 मध्येच आपल्या वापरासाठी हिरो कंपनीची काळ्या अन् सिल्व्हर रंगाची स्प्लेंडर प्लस ही नवी दुचाकी खरेदी केली होती. शनिवारी (ता. 19) दुपारी दीड वाजण्याच्या सुमारास टिळेकर यांनी आपली दुचाकी (क्र. MH 12 ZF 3310) उरुळी कांचन गावातील पुणे-सोलापूर हायवेलगत असलेल्या ‘अमर टायर’ दुकानासमोरील मोकळ्या जागेत हँडल लॉक करून पार्क केली आणि ते कामानिमित्त हडपसर येथे गेले होते.
त्यानंतर हडपसर येथील काम उरकून रात्री सव्वा अकरा वाजण्याच्या सुमारास ते दुचाकी पार्क केलेल्या ठिकाणी परत आले असता, त्यांना त्या जागेवर दुचाकी दिसून आली नाही. त्यांनी आजूबाजूच्या परिसरात आणि ओळखीच्या ठिकाणी शोध घेतला, मात्र गाडीचा कुठेही पत्ता लागला नाही. तपास पोलीस फौजदार सस्ते करत आहेत.
