Daund News: यवत, ता. 02 : नवीन मुठा उजवा कालव्यावरील गेटचे वेल्डिंग व साखळीचे कुलूप तोडून अज्ञात व्यक्तींनी कालव्याचे पाणी बेकायदेशीररीत्या वळविल्याचा धक्कादायक प्रकार उघडकीस आला आहे. या घटनेमुळे सिंचन व्यवस्थेत अनियमितता निर्माण होऊन शासकीय मालमत्तेचे नुकसान झाल्याप्रकरणी अज्ञात व्यक्तीविरुद्ध यवत पोलीस ठाण्यात गुन्हा दाखल करण्यात आला आहे.
या प्रकरणी अर्चना रावसाहेब कुलांगे (वय 33, शाखा अधिकारी, पाटबंधारे विभाग उरुळी कांचन, रा. उरुळी कांचन वसाहत, ता. हवेली, जि. पुणे) यांनी यवत पोलीस ठाण्यात अज्ञात व्यक्तीविरुद्ध शासकीय तक्रार दाखल केली आहे. त्यानुसार संबंधितांविरुद्ध गुन्हा नोंदविण्यात आला आहे.
पोलिसांनी दिलेल्या माहितीनुसार, फिर्यादी अर्चना कुलांगे या पाटबंधारे विभाग, उरुळी कांचन येथे शाखा अधिकारी म्हणून कार्यरत असून नवीन मुठा उजवा कालवा कि.मी. 43 ते 54 या हद्दीतील पाहणी, पाणीपट्टी व्यवस्थापन व सिंचन नियंत्रणाची जबाबदारी त्यांच्याकडे आहे. गुरुवारी (ता. 26 फेब्रुवारी) दुपारी सुमारे दोन वाजण्याच्या सुमारास त्या गस्त घालत होत्या.
यावेळी बिटधारक गजानन डोंबाळे व स्थानिक अभियंता ओंकार हराळे यांच्यासह कालव्याची पाहणी करत असताना कासुर्डी (ता. दौंड) येथील भोंडवेवस्ती येथे कि.मी. 61/090 वरील अतीवाहक गेटची तपासणी करण्यात आली. त्यावेळी अज्ञात व्यक्तींनी गेटचे वेल्डिंग तोडून साखळीचे कुलूप तोडल्याचे निदर्शनास आले. गेटची तोडफोड करून कालव्याचे पाणी शेजारील ओढ्याकडे वळविण्यात आले होते.
दरम्यान, या प्रकारामुळे कालव्याच्या पाणी वितरण व्यवस्थेत अनियमितता निर्माण झाली असून शासकीय मालमत्तेचे नुकसान झाले आहे. कोणतीही अधिकृत परवानगी न घेता पाणी वळविण्यात आल्याने अज्ञात व्यक्तीविरुद्ध गुन्हा दाखल करण्यात आला असून पुढील तपास पोलीस करत आहेत.
