Dand Crime: दौंड तालुक्यातील पारगाव येथे एक थरारक घटना घडली. सोन्या-चांदीच्या वाढत्या किमतींच्या पार्श्वभूमीवर घरफोड्या वाढत असतानाच, दौंड तालुक्यातील पारगाव येथे स्थानिक तरुणांनी दाखवलेल्या धाडसामुळे एक मोठी चोरी टळली आहे. (Pune Crime Latest News)
समोर आलेल्या माहितीनुसार, राहुल मालवी आणि प्रेमचंद चित्रावट असे चोरट्यांची नावे आहेत. तरुणांनी त्यांचा थरारक पाठलाग करत पकडून पोलिसांच्या हवाली केलं.
हेही वाचा: पुणेकरांनो सावधान! औंध आणि लोहगाव भागांत बिबट्याचे दर्शन; वन विभागाकडून अलर्ट जारी
नेमकं काय घडलं ?
22 नोव्हेंबर रोजी मध्यरात्री सुमारास चार परप्रांतीय चोरट्यांनी राहू–पारगाव रोडवरील एका खासगी ज्वेलर्स दुकानात चोरीचा प्रयत्न केला. दुकानाच्या प्रवेशद्वारावरील सीसीटीव्ही कॅमेऱ्याची दिशा काठीच्या साहाय्याने बदलण्याचा त्यांचा प्रयत्न समोरील आयसीआयसीआय बँकेच्या सुरक्षा रक्षकाच्या नजरेत आला. सुरक्षा रक्षकाने तत्काळ दुकानमालक मनोहरसिंग नागवेसी यांना माहिती देत सावध केले.
घटनेची माहिती मिळताच गावातील काही तरुण घटनास्थळी दाखल झाले. आलेल्या तरुणांची चाहूल लागताच चोरटे वाहनासह पळाले आणि रस्त्यालगतच्या उसाच्या शेतात जाऊन लपले.
हेही वाचा: तर… ही निवडणूक मराठी माणसासाठी शेवटची…! – राज ठाकरे
यवत पोलिसांच्या स्वाधीन
युवकांनी त्यांचा शोध घेतला. काही काळानंतर, ग्रामस्थ निघून गेल्याचे त्यांना वाटले. त्यानंतर चोरटे लपलेल्या जागेवरून बाहेर निघताच दबा धरून बसलेल्या तरुणांनी जवळपास 200 मीटर धाव घेत दोघांना थरारक पाठलाग करत पकडले. त्यानंतर तरुणांनी दोघांना चांगलाच धडा शिकवून त्यांना यवत पोलिसांच्या स्वाधीन केलं.
यवत पोलिसांनी राहुल मालवी आणि प्रेमचंद चित्रावट अशी ओळख पटलेल्या आरोपींना अटक केली. त्यांच्या ताब्यातून चोरीसाठी वापरलेली दुचाकी जप्त करण्यात आली आहे. याप्रकरणी न्यायालयाने दोन्ही आरोपींना सहा दिवसांची पोलिस कोठडी सुनावली आहे.
स्थानिक तरुणांच्या योग्य वेळी दाखवलेल्या धाडसामुळे पारगावात मोठ्या चोरीचा प्रयत्न हाणून पाडण्यात यश आलं आहे.
