पुणे: पुणे (Pune News) शहराच्या औंध आणि लोहगाव विमानतळ या दोन महत्त्वाच्या भागांत बिबट्या फिरताना दिसल्यामुळे नागरिकांमध्ये भीतीचे वातावरण पाहायला मिळत आहे. जनतेच्या सुरक्षेचा विचार करून वन विभागाने या परिसरातील लोकांना काळजी घेण्यास आणि अधिक सतर्क राहण्यास सांगितले आहे.
वन विभागाने दिलेल्या माहितीनुसार, लोहगावच्या हद्दीत बिबट्याचे निरीक्षण गेल्या 15-20 दिवसांपासून सुरू आहे. या भागात बिबट्याला पकडण्यासाठी सापळा पिंजरा आणि काही कॅमेरा ट्रॅप आधीच बसवण्यात आले आहेत. पुणे विमानतळ प्राधिकरणाने 20 नोव्हेंबर रोजी वन विभागाला कळवले होते की, 19 नोव्हेंबरला पहाटे विमानतळ परिसरात बिबट्या दिसला होता.
दरम्यान, औंध परिसरातही बिबट्याच्या दर्शनाने दहशत वाढली आहे. औंध येथील आरबीआय कॉलनी आणि सिंध सोसायटीजवळ रविवारी सकाळी बिबट्या दिसला होता. वन विभाग आणि रेस्क्यू सिटी पथके या भागात लक्ष ठेवून आहेत.
