पुणे: पुण्यातील खराडी परिसरात तडीपार असलेल्या सराईत गुन्हेगाराने सार्वजनिक कार्यक्रमात उघडपणे हजेरी लावत दहशत निर्माण केल्याची घटना समोर आली आहे. यामुळे शहरातील कायदा-सुव्यवस्थेवर पुन्हा प्रश्नचिन्ह उपस्थित झाले आहे.
निखिल कांबळे (वय 23, रा. लक्ष्मीनगर, येरवडा) असे आरोपीचे नाव असून, त्याच्यावर यापूर्वी गंभीर गुन्हे दाखल आहेत. पोलिसांनी तडीपार आदेश दिलेला असतानाही तो शहरात मुक्तपणे वावरत असल्याचे या घटनेतून दिसून आले.
मिळालेल्या माहितीनुसार, खराडी येथे आयोजित रामनवमीच्या कार्यक्रमात आरोपी आपल्या समर्थकांसह दाखल झाला. यावेळी मोठ्या आवाजात गाणी लावत “डॉन आहे मी, बाप आहे मी” अशा प्रकारची डायलॉगबाजी करत त्याने शक्तीप्रदर्शन केले. या प्रकारामुळे कार्यक्रमस्थळी उपस्थित नागरिकांमध्ये भीतीचे वातावरण निर्माण झाले.
विशेष म्हणजे, हा आरोपी यापूर्वीही अशाच प्रकारे वाढदिवस साजरा करत दहशत निर्माण करताना दिसला होता. त्या प्रकरणी त्याच्यावर मोक्का अंतर्गत कारवाईही करण्यात आली होती. तरीही तो पुन्हा सार्वजनिक ठिकाणी अशा पद्धतीने वावरताना दिसल्याने पोलिसांच्या अंमलबजावणीवर प्रश्न उपस्थित होत आहेत.
या प्रकरणात आरोपीच्या काही साथीदारांवरही गंभीर गुन्हे दाखल असून ते सध्या फरार असल्याची माहिती आहे. दरम्यान, या घटनेचा व्हिडिओ सोशल मीडियावर व्हायरल झाला असून पोलिसांनी त्याची दखल घेतली आहे.
तडीपार आदेशाचे उल्लंघन करून सार्वजनिक ठिकाणी दहशत निर्माण करणाऱ्या आरोपीवर कठोर कारवाई करावी, अशी मागणी नागरिकांकडून होत आहे. शहरात अशा प्रकारच्या घटनांना आळा घालण्यासाठी पोलिसांनी अधिक कडक पावले उचलण्याची गरज व्यक्त केली जात आहे.
