शिरूर: परप्रांतीय तसेच संशयित बांगलादेशी नागरिकांच्या वास्तव्यासंदर्भात पडताळणी करण्यासाठी शिरूर पोलीस व पुणे ग्रामीण दहशतवाद विरोधी शाखेने संयुक्त शोधमोहीम हाती घेतली.या मोहिमेदरम्यान घरमालकांनी आपल्या भाडेकरूंची विहित नमुन्यातील माहिती स्थानिक पोलीस ठाण्यात न दिल्याचे आढळून आल्याने तिघा घरमालकांविरुद्ध शिरूर पोलीस ठाण्यात गुन्हे दाखल करण्यात आले आहेत.
पोलिसांनी १७ जुलै रोजी तरडोबाची वाडी येथील अष्टविनायक विहार सोसायटी परिसरात तपासणी केली.यावेळी काही भाडेकरू रांजणगाव एमआयडीसी परिसरात काम करत असून ते संबंधित घरमालकांच्या फ्लॅटमध्ये वास्तव्यास असल्याचे आढळले.मात्र,त्यांच्याशी कोणताही भाडेकरार करण्यात आला नव्हता तसेच भाडेकरूंची माहिती शिरूर पोलीस ठाण्यात सादर करण्यात आलेली नव्हती.
या प्रकरणी पुणे जिल्हाधिकाऱ्यांनी भारतीय नागरिक सुरक्षा संहिता कलम १६३ अन्वये जारी केलेल्या आदेशाचे उल्लंघन केल्याप्रकरणी बाळासाहेब बाबुराव मेंगवडे (तरडोबाची वाडी), विशाल मारुती मोरे (बाबुराव नगर,शिरूर) आणि गोरख एस.चव्हाण (निमोणे) यांच्याविरुद्ध शिरूर पोलीस ठाण्यात अनुक्रमे गुन्हे दाखल करण्यात आले आहेत.
ही कारवाई पोलीस निरीक्षक विनोद पाटील यांच्या मार्गदर्शनाखाली शिरूर पोलीस स्टेशन व पुणे ग्रामीण दहशतवाद विरोधी शाखेच्या संयुक्त पथकाने केली. या मोहिमेत सहाय्यक पोलीस निरीक्षक दत्ताजीराव मोहिते तसेच संबंधित अधिकारी व कर्मचाऱ्यांचा सहभाग होता.
दरम्यान,आपल्या घरात किंवा इमारतीत भाडेकरू ठेवणाऱ्या सर्व घरमालकांनी भाडेकरूंची संपूर्ण माहिती विहित नमुन्यात स्थानिक पोलीस ठाण्यात जमा करावी. अन्यथा जिल्हाधिकाऱ्यांच्या आदेशाचे उल्लंघन केल्याप्रकरणी कायदेशीर कारवाईला सामोरे जावे लागेल,असा इशारा शिरूर पोलिसांनी दिला आहे.
