मिरा रोड : मिरा रोड पूर्वेकडील सेवेन स्क्वेअर अकॅडमी शाळेतील एका मेसेजमुळे सध्या वाद निर्माण झाला आहे. पर्यूषण पर्वाच्या काळात विद्यार्थ्यांनी डब्यात कांदा, लसूण, बटाटा आणि बीट यांसारखे कंदमूळ पदार्थ आणू नयेत, अशी विनंती पालकांच्या व्हॉट्सॲप ग्रुपवर करण्यात आली. तसेच शाळेच्या कॅन्टीनमध्येही या कालावधीत हे पदार्थ वापरले जाणार नसल्याचे मेसेजमध्ये नमूद करण्यात आले.
या प्रकाराची माहिती मनसेच्या पदाधिकाऱ्यांना मिळाल्यानंतर पक्षाने आक्षेप घेतला. मनसे पदाधिकारी सचिन पोपळे यांनी शाळेच्या भूमिकेवर प्रश्न उपस्थित करत विद्यार्थ्यांच्या डब्यात कोणते पदार्थ असावेत, याबाबत निर्णय घेण्याचा अधिकार शाळेला कोणी दिला, असा सवाल केला. ही शाळा भाजप आमदार नरेंद्र मेहता यांच्याशी संबंधित असल्याचे सांगत मनसेने या मुद्द्यावरून टीका केली.
दरम्यान, मिरा-भाईंदर परिसरात यापूर्वीही खाद्यपदार्थ, भाषा आणि विविध समाजांशी संबंधित मुद्द्यांवरून वाद झाले आहेत. त्यामुळे पर्यूषण पर्वाच्या पार्श्वभूमीवर आलेल्या या मेसेजमुळे पुन्हा एकदा वातावरण तापण्याची शक्यता व्यक्त केली जात आहे.
या प्रकरणावर आमदार नरेंद्र मेहता यांनी शाळेकडून कोणतीही सक्ती करण्यात आलेली नसल्याचे स्पष्ट केले. पर्यूषण हा जैन समाजासाठी महत्त्वाचा आणि पवित्र काळ असून, या कालावधीत प्राणीहत्येला आळा बसावा या भावनेतून पालकांना केवळ विनंती करण्यात आली होती, असे त्यांनी सांगितले. मेसेजमध्ये कुठेही सक्तीचा उल्लेख नसल्याचेही त्यांनी स्पष्ट केले. प्रशासनाने कोणताही निर्णय घेताना शहरातील सामाजिक सलोखा कायम राहील, याची काळजी घ्यावी, अशी मागणीही करण्यात येत आहे.
