पुणे : महाराष्ट्र लोकसेवा आयोगाकडून स्पर्धा परीक्षेची तयारी करणाऱ्या उमेदवारांसाठी एक महत्त्वपूर्ण अपडेट समोर आली आहे. आयोगाने आयोजित केलेली ‘महाराष्ट्र गट-क सेवा संयुक्त पूर्व परीक्षा 2026’ पुन्हा एकदा लांबणीवर पडली आहे. यासंदर्भातील अधिकृत शुद्धीपत्रक आयोगाने आपल्या संकेतस्थळावर प्रसिद्ध केले आहे.
महाराष्ट्र गट -क संयुक्त पूर्व परीक्षा यापूर्वी 16 जुलै 2026 रोजी काढलेल्या प्रसिद्धीपत्रकानुसार 25 ऑक्टोबर 2026 रोजी ओएमआर पद्धतीने घेण्यात येणार होती. मात्र, आता या नियोजनात बदल करण्यात आला असून, ही पूर्व परीक्षा आता 3 जानेवारी 2027 रोजी राज्यातील सर्व जिल्हा केंद्रांवर पार पडणार आहे. परीक्षा सुरळीत, सुरक्षित आणि पारदर्शक वातावरणात पार पडावी यासाठी प्रशासकीय स्तरावर विविध बाबींचा विचार करून हा निर्णय घेण्यात आला आहे.
परीक्षेची वेळ, प्रवेशपत्र (Admit Card), परीक्षा केंद्र आणि इतर आवश्यक मार्गदर्शक सूचना MPSC च्या अधिकृत संकेतस्थळावर वेळेनुसार उपलब्ध करून दिल्या जातील. उप सचिव विवेक देशमुख यांनी सर्व उमेदवारांना या बदलेल्या तारखेची नोंद घेण्याचे आणि पुढील अपडेट्ससाठी नियमितपणे आयोगाच्या mpsc.gov.in या अधिकृत संकेतस्थळाला भेट देण्याचे आवाहन केले आहे.
तसेच राज्य सेवा (मुख्य) परीक्षा 2026, आगामी सणासुदीचा कालावधी, इतर भरतीसंस्थांच्या परीक्षांचे वेळापत्रक आणि हिवाळी अधिवेशन इत्यादी बाबींचा ताळमेळ राखण्यासाठी हा निर्णय घेण्यात आल्याची माहिती एमपीएससी कडून देण्यात आली आहे.
