डॉ. अशोक बालगुडे
पुणे: पुणे मेट्रोच्या गर्दीच्या वेळेतील प्रवाशांना मोठा दिलासा मिळणार असून, लवकरच दर पाच मिनिटांनी मेट्रोची फेरी उपलब्ध होणार आहे. सध्या गर्दीच्या वेळेत दर सहा मिनिटांनी मेट्रो धावत असून, वनाज-रामवाडी मार्गिकेवरील चाचण्या पूर्ण झाल्या आहेत. स्वारगेट-पिंपरी-चिंचवड मार्गिकेवरील चाचण्या सुरू असून त्या पूर्ण झाल्यानंतर या मार्गावरही गर्दीच्या वेळेत दर पाच मिनिटांनी मेट्रो धावणार आहे, अशी माहिती महामेट्रोचे अध्यक्ष तथा व्यवस्थापकीय संचालक श्रावण हर्डीकर यांनी दिली.
सकाळी ८ ते ११ आणि सायंकाळी ४ ते ८ या गर्दीच्या वेळेत सध्या दर सहा मिनिटांनी मेट्रो उपलब्ध आहे. प्रस्तावित बदलानंतर या वेळेत दर पाच मिनिटांनी मेट्रो धावेल. सकाळी ११ ते सायंकाळी ४ आणि रात्री ८ ते ११ या तुलनेने कमी गर्दीच्या वेळेत दर दहा मिनिटांची सेवा कायम राहणार आहे.
मेट्रोचा वापर करणाऱ्या प्रवाशांची संख्या दिवसेंदिवस वाढत आहे. सध्या दररोज सरासरी अडीच लाखांहून अधिक प्रवासी मेट्रोने प्रवास करीत आहेत. गेल्या आठवडाभरात १७ लाख ८३ हजार ९३९ प्रवाशांनी मेट्रोचा वापर केला. त्यातून २ कोटी ७१ लाख ४१ हजार ३७१ रुपयांचे उत्पन्न मिळाले. ५ सप्टेंबरला एका दिवसात तब्बल २ लाख ७७ हजार प्रवाशांनी मेट्रोने प्रवास केला. त्यामुळे वाढत्या प्रवासी संख्येच्या पार्श्वभूमीवर गर्दीच्या वेळेत फेऱ्या वाढविण्याचा निर्णय महत्त्वाचा मानला जात आहे.
गणेशोत्सवात मध्यरात्रीपर्यंत सेवा
गणेशोत्सवाच्या पार्श्वभूमीवर मेट्रोच्या वेळेतही बदल करण्यात आला आहे. उत्सवाच्या पहिल्या तीन दिवसांत नेहमीप्रमाणे रात्री ११ वाजेपर्यंत सेवा सुरू राहील. त्यानंतर काही दिवस रात्री १२ वाजेपर्यंत मेट्रो धावणार आहे. गणेशमूर्ती विसर्जनाच्या दिवशी प्रवाशांच्या सोयीसाठी चोवीस तास मेट्रो सेवा उपलब्ध करून देण्यात येणार आहे. उत्सवकाळात गर्दीच्या वेळेतील सेवा सध्या असलेल्या सहा मिनिटांच्या अंतराने सुरू राहणार आहे.
स्वारगेट-पिंपरी मार्गावर चाचणी
वनाज-रामवाडी मार्गिकेवर दर पाच मिनिटांच्या फेरीसाठी आवश्यक चाचण्या पूर्ण झाल्या आहेत. आता स्वारगेट-पिंपरी-चिंचवड मार्गिकेवर चाचण्या सुरू आहेत. या चाचण्या पूर्ण झाल्यानंतर या मार्गावरही गर्दीच्या वेळेत फेऱ्यांमधील अंतर पाच मिनिटांवर आणले जाणार आहे. त्यामुळे कामानिमित्त सकाळ-संध्याकाळ प्रवास करणाऱ्या हजारो प्रवाशांचा प्रतीक्षेचा वेळ कमी होण्याची शक्यता आहे.
