पुणे: पुण्यातील कोथरूड परिसरात नवविवाहित महिलेने आत्महत्या केल्याची दुर्दैवी घटना समोर आली आहे. लग्नाला काही महिनेच झाले असताना पतीचे दुसऱ्या महिलेसोबत संबंध असल्याचे समोर आल्याने वैवाहिक जीवनात तणाव निर्माण झाला होता. या परिस्थितीत पतीकडून होत असलेल्या कथित मानसिक आणि शारीरिक छळाला कंटाळून तिने हे टोकाचे पाऊल उचलल्याचा आरोप आहे.
सोनाली गोविंद पवार, वय 25, रा. सुतारदरा, कोथरूड, असे मृत महिलेचे नाव आहे. घटनेनंतर तिच्या पतीविरोधात कोथरूड पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, सोनाली आणि गोविंद यांचा काही महिन्यांपूर्वी विवाह झाला होता. लग्नानंतर सुरुवातीचे दिवस सुरळीत गेले. मात्र, त्यानंतर गोविंदचे दुसऱ्या एका महिलेसोबत संबंध असल्याची माहिती सोनालीला मिळाल्याचे सांगण्यात येते. या कारणावरून दोघांमध्ये वारंवार वाद होऊ लागले.
पतीच्या कथित विवाहबाह्य संबंधांमुळे सोनाली मानसिक तणावात होती. तसेच तिला शिवीगाळ आणि मारहाण केली जात असल्याचा आरोपही करण्यात आला आहे. सततच्या कौटुंबिक वादामुळे ती त्रस्त झाल्याचे पोलिसांच्या तपासातून समोर येत आहे.
या प्रकरणी पती गोविंद पवार याच्याविरोधात आत्महत्येस प्रवृत्त केल्याच्या आरोपाखाली गुन्हा दाखल करण्यात आला आहे. वैवाहिक वाद, कथित छळ आणि पतीच्या दुसऱ्या महिलेसोबतच्या संबंधांबाबत पोलीस अधिक तपास करत आहेत.
