पुणे : पुणे महानगरपालिकेच्या ड्रेनेज लाईनचे काम सुरू असलेल्या एका उघड्या खड्ड्यात पडून प्रदीप परदेशी (वय 55) या व्यक्तीचा दुर्दैवी मृत्यू झाला असल्याची माहिती समोर आली आहे.शहरातील येरवडा येथील मच्छी मार्केट परिसरात 17 ऑक्टोबर रोजी सायंकाळच्या सुमारास ही घटना घडली होती m
मिळालेल्या माहितीनुसार, रस्त्यावरून जात असताना एका रिक्षाचा धक्का लागल्यामुळे परदेशी हे शेजारीच असलेल्या 10 ते 15 फूट खोल खड्ड्यात कोसळले. या दुर्घटनेत ते गंभीर जखमी झाले होते. त्यांना तातडीने उपचारासाठी रुग्णालयात दाखल करण्यात आले, मात्र उपचारादरम्यान त्यांचा मृत्यू झाला. या घटनेनंतर संतप्त झालेल्या मृताच्या नातेवाईकांनी आणि स्थानिकांनी लक्ष्मीनगर पोलीस ठाण्यात धाव घेऊन दोषींवर कडक कारवाई करण्याची मागणी केली आहे.
कामाच्या ठिकाणी सुरक्षेची कोणतीही योग्य बॅरिकेट्स किंवा उपाययोजना न केल्याचा गंभीर आरोप स्थानिक नागरिकांनी केला आहे. यापूर्वीही या भागात अशाच स्वरूपाचे छोटे-मोठे अपघात घडल्याचे रहिवाशांचे म्हणणे आहे. या प्रकरणी पोलीस सध्या अधिक तपास करत आहेत.
नागरी सुरक्षेकडे होणाऱ्या दुर्लक्षाचे हे पहिलेच प्रकरण नाही. यापूर्वी जुलै महिन्यात मुंबईतील साकीनाका भागातील खैराणी रोडवर उघड्या मॅनहोलमध्ये पडून एका व्यक्तीचा जीव गेला होता. मोबाईलवर बोलत असताना संबंधित व्यक्ती कंत्राटदाराने उघड्या ठेवलेल्या मॅनहोलमध्ये पडली आणि पाण्याचा प्रवाह वेगात असल्याने वाहून गेली होती. नंतर शोध मोहिमेदरम्यान त्यांचा मृतदेह हाती आला होता.
. मुंबई असो वा पुणे, ड्रेनेज व मॅनहोलच्या कामांदरम्यान सुरक्षेचे नियम धाब्यावर बसवले जात असल्याने निष्पाप नागरिकांना आपला जीव गमवावा लागत आहे. त्यामुळे अशा निष्काळजी कंत्राटदारांवर आणि जबाबदार अधिकाऱ्यांवर कठोर कारवाई कधी होणार, असा संतप्त सवाल सर्वसामान्य नागरिक विचारत आहेत.
