पुणे : बॉलिवूडचा परफेक्शनिस्ट आमिर खान सध्या विशेष चर्चेत आला आहे. आमिर खानने महाराष्ट्र नवनिर्माण सेनेचे (मनसे) अध्यक्ष राज ठाकरे यांची त्यांच्या ‘शिवतीर्थ’ या निवासस्थानी जाऊन भेट घेतली. या भेटीदरम्यान आमिरसोबत त्याची पार्टनर गौरी स्प्रट देखील उपस्थित होती. दोघांमध्ये कोणत्या विषयावर चर्चा झाली याचे कारण अधिकृतपणे समोर आले नसले, तरी सध्या राजकीय आणि चित्रपट वर्तुळात या भेटीची मोठी चर्चा सुरू आहे.
मिळालेल्या माहितीनुसार, आमिर खानचा भाचा आणि अभिनेता इम्रान खान याला मुंबईच्या परदेशी क्षेत्रीय नोंदणी कार्यालयाकडून 28 ऑक्टोबर 2026 पर्यंत भारत सोडण्याची नोटीस देण्यात आली आहे. या नोटीशीविरोधात इम्रान खानने मुंबई उच्च न्यायालयात याचिका दाखल करत त्याला आव्हान दिले आहे.
हे संपूर्ण प्रकरण 10 ऑक्टोबर 2026 रोजी घडलेल्या एका घटनेशी जोडलेले आहे. ‘सीजेपी’ (CJP) या संघटनेने केंद्रीय मुख्य निवडणूक आयुक्त ज्ञानेश कुमार यांच्याविरोधात आंदोलन पुकारले होते. मुंबईतील ऑगस्ट क्रांती मैदान येथे पार पडलेल्या या आंदोलनात इम्रान खान आणि त्याची मैत्रीण लेखा वॉशिंग्टन सहभागी झाले होते. त्यावेळी पोलिसांनी त्यांना ताब्यात घेतले होते. या आंदोलनातील सहभागावरून भाजप नेते किरीट सोमय्या यांनी मुंबई पोलिसांकडे चौकशीची मागणी केली होती.
राज ठाकरे यांनीही यापूर्वी मुख्य निवडणूक आयुक्तांच्या मुद्द्यावरून आक्रमक भूमिका घेतली आहे. तसेच आमिर खान आणि राज ठाकरे यांच्यातील मैत्रीपूर्ण संबंध सर्वश्रुत आहेत. यामुळेच आपल्या भाचाला आलेल्या नोटीशीच्या पार्श्वभूमीवर आमिरने राज ठाकरे यांची भेट घेतल्याचे बोलले जात आहे. या भेटीचे फोटो सध्या सोशल मीडियावर वेगाने व्हायरल होत आहेत.
