उरुळी कांचन, (पुणे) : पुणे-सोलापूर महामार्गावरील उरुळी कांचन परिसरात हॉटेल आणि खाद्यपदार्थांच्या दुकानांच्या आडून अवैध दारूविक्रीचा धंदा सुरू असल्याचे दोन वेगवेगळ्या पोलीस कारवायांतून समोर आले आहे. ‘हॉटेल गुरू चायनीज पॉईंट’मध्ये चायनीज पदार्थांच्या व्यवसायाच्या आडून देशी-विदेशी दारूची विक्री केल्याप्रकरणी एकाला अटक करण्यात आली होती. तर खेडेकर मळा परिसरातील जगदंबा हॉटेलमधूनही देशी-विदेशी दारूचा साठा जप्त करण्यात आला. सलग उघडकीस येणाऱ्या या प्रकारांमुळे उरुळी कांचनमध्ये हॉटेल जेवणासाठी आहेत की दारूविक्रीची केंद्रे बनली आहेत, असा संतप्त सवाल नागरिक उपस्थित करीत आहेत.

पुणे-सोलापूर महामार्गावरील उरुळी कांचन हद्दीत ‘हॉटेल गुरू चायनीज पॉईंट’च्या गाळ्यात विनापरवाना आणि बेकायदेशीरपणे देशी-विदेशी दारूची विक्री सुरू असल्याची माहिती पोलिसांना मिळाली होती. त्यानुसार उरुळी कांचन पोलिसांनी सोमवारी (ता. 26 ऑक्टोंबर) रात्री साडेआठच्या सुमारास छापा टाकून कारवाई केली. या प्रकरणी हुसेन गफ्फुर शेख (वय 42, सध्या रा. उरुळी कांचन; मूळ रा. गाडेगाव रोड, बार्शी, जि. सोलापूर) याला अटक करण्यात आली आहे. याप्रकरणी पोलीस अंमलदार राहुल आव्हाळे यांनी फिर्याद दिली होती.
दुसरीकडे, खेडेकर मळा परिसरातील जगदंबा हॉटेलमध्ये देशी-विदेशी दारूचा साठा करून विक्री केली जात असल्याची माहिती मिळाल्यानंतर पोलिसांनी रविवारी (ता. 15) नोव्हेंबर सायंकाळी छापा टाकला. या कारवाईत सुग्रीवदास शिवनाथ साकेत (वय 53, सध्या रा. खेडेकर मळा, उरुळी कांचन; मूळ रा. रीवा, मध्य प्रदेश) याच्याकडून 1 हजार 780 रुपये किमतीच्या 22 दारूच्या बाटल्या जप्त करण्यात आल्या. त्याच्याविरुद्ध महाराष्ट्र दारूबंदी कायद्याच्या कलम 65 (ई) नुसार गुन्हा दाखल करण्यात आला आहे.

थातूरमातूर कारवायांनी अवैध धंदे थांबणार कसे?
एका बाजूला चायनीज सेंटरच्या नावाखाली दारूविक्री, तर दुसऱ्या बाजूला हॉटेलमध्ये दारूसाठा आढळत असल्याने परिसरातील अवैध धंद्यांचा प्रश्न पुन्हा ऐरणीवर आला आहे. पोलिसांकडून अधूनमधून छापे टाकून कारवाई केली जात असली, तरी अशा प्रकारांना कायमचा आळा बसणार कधी, असा सवाल नागरिक करीत आहेत. केवळ एखाद्या विक्रेत्याला पकडून किंवा किरकोळ दारूसाठा जप्त करून अवैध विक्रीचे जाळे उद्ध्वस्त होणार आहे का, असा प्रश्नही उपस्थित होत आहे.

कारवाई केवळ कागदावरच
गेल्या काही महिन्यात पोलिसांनी मटका, जुगार, बेकायदा दारू विक्रीविरोधात मोहीम उघडली आहे. मटका, बेकायदा दारू विक्रेत्यांवर कारवाई केली जात आहे. पण या गुन्ह्यांमध्ये संशयितांना नोटीस देऊन सोडले जाते. त्यामुळे पोलिसांच्या कारवाईची भीतीच गुन्हेगारांना राहिलेली नाही. अवैध धंद्यांवरील कारवाईची केवळ कागदेच रंगविली जातात. संशयिताला फारशी शिक्षा होत नसल्याने अवैध धंदेवाल्यांचे धाडस वाढले आहे.
दरम्यान, उरुळी कांचन परिसरात हॉटेल, खाद्यपदार्थांची दुकाने आणि व्यावसायिक आस्थापनांच्या नावाखाली नेमके कोणते व्यवसाय सुरू आहेत, याची व्यापक तपासणी करण्याची मागणी होत आहे. अवैध दारूविक्री करणाऱ्यांवर कठोर कारवाई करून अशा व्यवसायांना पाठीशी घालणाऱ्यांचाही शोध घ्यावा, अशी नागरिकांची अपेक्षा आहे. अन्यथा पोलिसांच्या कारवाया केवळ कागदोपत्री आणि दिखाव्यापुरत्याच असल्याचा आरोप नागरिकांकडून होऊ लागला आहे.
याबाबत उरुळी कांचन पोलीस ठाण्याच्या वरिष्ठ पोलीस निरीक्षक विजयमाला पवार यांच्याशी फोनवरून संपर्क साधण्याचा प्रयत्न केला. मात्र, त्यांनी फोन न उचलल्याने त्यांची अधिकृत प्रतिक्रिया समजू शकली नाही.






