लोणी काळभोर, (पुणे) : पुणे-सासवड रस्त्यावर अंधारात उभ्या केलेल्या कंटेनरला कारने पाठीमागून दिलेल्या धडकेत जोरदार धडक दिली. या भीषण अपघातात कारमधील दोघांचा मृत्यू झाला, तर कारचालक किरकोळ जखमी झाला. मंगळवारी (ता. 10) मध्यरात्री सव्वाबारा वाजण्याच्या सुमारास वडकी (ता. हवेली) येथील दहाव्या मैलाजवळील सेवा रस्त्यावर ही घटना घडली.
संजय वसंत मोडक (वय-49) आणि अविनाश बाळासाहेब अर्णे (वय -35, दोघे रा. दहावा मैल, वडकी, ता. हवेली) अशी मृतांची नावे आहेत. याप्रकरणी सुनील दिगंबर मोडक (वय-39, रा. दहावा मैल, वडकी) यांनी फुरसुंगी पोलीस ठाण्यात फिर्याद दिली आहे. त्यानुसार पोलिसांनी कंटेनरचालकाविरुद्ध गुन्हा दाखल केला आहे.
पोलिसांनी दिलेल्या माहितीनुसार, कंटेनरचालकाने हरियाणा पासिंगचा (एच.आर.56 सी 2844) कंटेनर हडपसरच्या दिशेने जाणाऱ्या सर्व्हिस रोडवर उभा केला होता. या ठिकाणी वाहन पार्किंगला परवानगी नसतानाही त्याने कंटेनर उभा केला होता. विशेष म्हणजे, रात्रीच्या अंधारात कंटेनर उभा करताना पार्किंगचे दिवेही सुरू ठेवले नव्हते. तसेच, वाहनाच्या मागील बाजूस सुरक्षिततेच्या दृष्टीने कोणतीही खबरदारी घेतली नव्हती.
याच निष्काळजीपणामुळे फिर्यादी यांच्या कारची कंटेनरला पाठीमागून जोरदार धडक बसली. धडकेची तीव्रता इतकी होती की, कारचे मोठे नुकसान झाले. या अपघातात संजय मोडक आणि अविनाश अर्णे यांचा मृत्यू झाला, तर कारचालक किरकोळ जखमी झाला. अपघातानंतर कंटेनरचालक घटनास्थळावरून पसार झाला असून, त्याची ओळख अद्याप पटलेली नाही.
दरम्यान, या प्रकरणी फुरसुंगी पोलीस ठाण्यात भारतीय न्याय संहितेच्या विविध कलमांसह मोटार वाहन कायद्यानुसार गुन्हा दाखल करण्यात आला आहे. तपास पोलीस उपनिरीक्षक संतोष मोरे करीत आहेत.
